Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 307 Hüküm no: 300 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası İbrahim’den boşanan Emetullah’ın mehr-i müeccelini tamamen aldığı Medîne-i Üsküdar’da Gerder [Gerede] Mahallesi sâkinelerinden olup zâtı İbrahim b. Mustafa ve Ahmed b. Şa‘ban nâm kimesneler ta‘rîfleriyle mu‘arrefe olan Emetullah bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i sâbıkı bâ‘isü’l-kitâb İbrahim b. ( ) mahzarında ikrâr-ı tâm ve takrîr-i kelâm edip mezbûr İbrahim ile beynimizde zevciyyet kāim olduğu hâlde târih-i kitâb günü talâk-ı sarîh ile beni tatlîk etmeğin zimmetinde mütekarrir ve ma‘kūdun-aleyh altı yüz akçe mehr-i müeccelim ile nafaka-i iddet ve meûnet-i süknâm için bi’t-terâzî ta‘yîn olunan üç yüz akçe ki cem‘an dokuz yüz akçeyi mezbûr İbrahim yedinden tamamen ahz u kabz eylediğimden sonra hukūk-ı zevciyyete ve beynimizde eşyâ da‘vâsına ve gayra müte‘allika da‘vâdan mezbûr İbrahim’in zimmetini ibrâ ve iskāt eyledim fîmâ-ba‘d mezbûr İbrahim ile bi-vechin mine’l-vücûh da‘vâ ve nizâ‘ ve husûmetim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Abdullah b. Mehmed, İbrahim b. Mustafa, Mahmud b. Hasan, Ahmed b. Mehmed, Ahmed b. Şa‘ban ve gayruhum.