Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 308 Hüküm no: 301 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Ahmed’in alacaklı olduğu Yasef v. Aslan’ın iflas ettiği şahitlerle sabit olduğu Bâ-imzâ-i Ebûbekir Efendi. Tüccârdan Ömer Çelebi b. Ahmed nâm kimesne meclis-i şer‘de Galata kazâsında Ortaköy’de sâkin hâmilü hâzihi’l-vesîka Yasef v. Aslan nâm Yahûdi muvâcehesinde üzerine da‘vâ ve takrîr-i kelâm [edip] mezbûr Yasef zimmetinde bürüncük semeninden yüz guruş hakkım vardır her bâr taleb eylediğimde edâdan imtinâ‘ eder suâl olunup habs olunması matlûbumdur dedikde gıbbe’s-suâl mezbûr Yasef deyn-i mezkûru ikrâr meblağ-ı mezbûru edâdan imtinâ‘ını i‘tirâf ve imtinâ‘ım edâsına kudretim olmadığı ecilden zîrâ ben müflis ve mu‘sir olup eyyâm ve leyâlîde lâbis olduğum libâsımdan gayrı ism-i mâl ıtlâk olunur bir nesnem yokdur hattâ dâyinlerimden nice kimesneler beni müddet-i medîd habs ve iflâsıma dâfi‘ler olduklarında beni habsden ıtlâk eylediler müflis ve mu‘sir olduğum meşhûr ve mütevâtirdir hâlâ ikrâr hâlâ edâ-yı deyne iktidârım yokdur deyicek isre’l-istintak müdde‘î-i mezbûr dahi hâlâ mezbûrun edâ-yı deynine iktidârı olduğuna beyyinesi olmadığını mu‘terif lâkin mezbûr Yasef’in ahvâli takrîr-i meşrûhu üzere olduğunu inkâr edicek bî-garaz udûl-i ricâl-i Müslimînden mezbûr Yasef’in ahvâline vâkıfîn olup zeyl-i vesîkada muharrerü’l-esâmî olan kimesneler meclis-i şer‘a hâzirûn olup mezbûr Yasef’in takrîr-i meşrûhu vâkı‘a mutâbık olduğuna şâhidleriz şehâdet dahi ederiz deyü münkir-i mezbûr Ömer Çelebi muvâcehesinde bi’l-icmâ‘ ve’l-ittifâk edâ-yı şehâdet-i şer‘iyye ettiklerinde mûcebince ba‘de’t-teneffüs? mezbûr Ömer Çelebi’ye tenbîh olunup mâ-vaka‘a bi’t-taleb ketb olundu. Hurrire fî-10 Cumâdelâhire sene [1]143. Şuhûdü’l-hâl: es-Seyyid Veli Çelebi b. Mustafa, Eskici Ali Çelebi b. İbrahim, İnekçi Mehmed Beşe b. Mehmed, Ali Çelebi b. Mehmed, İnekçi Ahmed Çelebi b. Mehmed, Ali b. Ahmed, Mehmed b. Abdi, Veli Çelebi b. Süleyman, Mustafa b. Mustafa.