Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 308 Hüküm no: 302 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Adanalı Arab el-Hâc Mustafa Ağa’nın el-Hâc Osman b. Hüseyin’de olan alacağını veresesinin tahsil ettiği Fi’l-asl Vilâyet-i Anadolu’da medîne-i Adana ahâlîsinden olup Mahmiye-i İstanbul’da Ayasofya-i kebîr Mahallesi’nde sâkin iken bundan akdem katîlen vefât eden Câmûscu demekle şehîr Arab el-Hâc Mustafa Ağa b. ( ) veresesi sulbî oğlu Mehmed nâm sagīrin vâlidesi ve tesviye-i umûruna ber-mûceb-i hüccet kıbel-i şer‘den mansûbe vasîsi olan Meryem bt. Abdullah nâm hatunun hâlâ zevci ve tarafeynden husûsü’l-beyâna vekîl olduğu yedinde mazmûnu müsbit hüccet nâtıka olduğu üzere sâbit olan Mustafa Ağa b. Mustafa nâm kimesne meclis-i şer‘-i şerîf-i enverde medîne-i mezbûre ahâlîsinden olup Mahmiye-i mezbûrede müsâfiren sâkin bâ‘isü hâze’l-kitâb el-Hâc Osman b. Hüseyin mahzarında bi’l-vekâle takrîr-i kelâm ve bast-ı merâm edip müteveffâ-i mezbûrun merkūm el-Hâc Osman zimmetinde cihet-i karzdan iki bin guruş hakkı olmağla zevcem müvekkile-i mezbûre meblağ-ı mezbûru bundan akdem bi’l-vesâye taleb ve da‘vâ ve mezbûr el-Hâc Osman ba‘de’l-ikrâr kıymetleri iki bin guruşa müsâvî yüz? bezi tâ‘bir olunur beş yüz yetmiş top bez[i] bana def‘ ve teslîm ben dahi ber-vech-i muharrer bi’l-vekâle yedinden ahz u kabz eyledim min-ba‘d meblağ-ı mezbûr iki bin guruşdan mezbûr el-Hâc Osman ve şerîki işbu Ananya v. Ese yedlerinde ve zimmetlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-şehri Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Molla Hüseyin b. Ca‘fer, Süleyman Çelebi b. Ali, İbrahim b. Ali, Ali Bey b. Receb, Mustafa Ağa, el-Hâc Mehmed b. Molla Şa‘ban, es-Seyyid Mehmed Çelebi b. Ali, Molla Ahmed b. Hızır, Nuri Çelebi b. Hüseyin, es-Seyyid İbrahim b. Ca‘fer, Mehmed Çelebi b. Abdullah.