Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 309 Hüküm no: 303 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Osman ile eşi Mehmed Ağa’nın muhala‘a yoluyla boşandıkları Mahmiye-i İstanbul’da Ayasofya-i kebîr kurbünde İshakpaşa Mahallesi sâkinelerinden olup zâtı mahalle-i mezbûre imâmı Ahmed Efendi b. Ali ve el-Hâc Ahmed b. Mustafa nâm kimesneler ta‘rîfleriyle mu‘arrefe olan Fâtıma bt. Osman nâm hatun meclis-i şer‘-i hatîr-i lâzımü’t-tevkīrde zevc-i dâhili bâ‘isü hâze’l-kitâb Mehmed Ağa b. Şa‘ban mahzarında ikrâr ve takrîr-i kelâm edip mezbûr Mehmed Ağa zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan elli guruş mehr-i müeccelimden on guruşunu zevcim mezbûr Mehmed Ağa bana def‘ ve teslîm ben dahi yedinden ahz u kabz eylediğimden sonra mâ‘adâ otuz guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Ağa ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete ve sâir[e] müte‘allika âmme-i da‘vâ ve kâffe-i mütâlebât ve muhâsamâtdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Recebi’l-ferd sene 1143. Şuhûdü’l-hâl: İmâm Ahmed Efendi b. Ali, el-Hâc Ahmed b. Mustafa, Ali Çelebi b. el-Hâc Mustafa, Osman Çelebi b. Ali, Mehmed Çelebi b. Abdullah.