Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 310 Hüküm no: 304 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşandığı kocası el-Hâc Ali b. Receb’in bazı eşyalarını aldığını iddia eden Rukiye bt. Hasan’ın bu iddiasının doğru olmadığı Mahmiye-i İstanbul’da Kumkapı kurbünde Mehmedpaşa Mahallesi sâkinelerinden Rukiye bt. Hasan nâm hatun meclis-i şer‘-i hatîr-i lâzımü’t-tevkīrde zevc-i sâbıkı işbu râfi‘u’l-vesîka el-Hâc Ali b. Receb nâm kimesne mahzarında üzerine da‘vâ ve takrîr-i kelâm edip mezbûr el-Hâc Ali zevciyyet beynimizde kāime iken eşyâ-i memlûkemden mecmû‘ üç yüz guruş kıymetli bir çift altın küpe ve bir incili kuşak, on dokuz miskāl bir çift altın bilezik ve on sekiz aded yaldız altınımı bi-gayr-ı hakkın ahz u kabz etmekle mârru’z-zikr eşyâ mevcûde ise [-aynının] müstehleke ise ba‘de’s-sübût kıymet-i şer‘iyyelerin taleb ederim deyü da‘vâ eyledikde mezbûr el-Hâc Ali cevâbında eşyâ-i mezkûreyi ahz u kabz eylediğini inkâr eylediğinde mâ‘adâ müdde‘iyye-i mezbûreyi târih-i kitâbdan on gün mukaddem bâyinen tatlîk eylediğimde zimmetimde mehr-i müeccel ve nafaka-i iddet ve meûnet-i süknâsı için bi’t-terâzî ta‘yîn olunan mecmu‘an altı bin altı yüz akçeyi kendiye ba‘de’l-edâ mezbûre Rukiye Hatun hukūk-ı zevciyyete ve târih-i mezkûreye gelince sâir <> [-beynimizde] cereyân eden ahz u i‘tâya müte‘allika âmme-i da‘vâdan benim zimmetimi ibrâ ve iskāt etmişidi deyü da‘vâyı def‘ edicek gıbbe’l-istintak ve’l-inkâr merkūm el-Hâc Ali’den def‘-i mezkûruna mübeyyine beyyine taleb olundukda mahalle-i mezbûre imâmı Mehmed Efendi b. Osman ve Müezzin Mehmed Çelebi b. Süleyman nâm kimesneler li-ecli’ş-şehâde meclis-i şer‘a hâzırân olup işhâd olunduklarında fi’l-hakīka işbu mezbûre Rukiye Hatun’u târih-i kitâbdan on gün mukaddem zevci mezbûr el-Hâc Ali bâyinen tatlîk eyledikde mezbûre Rukiye Hatun’un mehr-i mü[ecceli] ve nafaka-i iddet ve meûnet-i süknâsi’çün bi’t-terâzî ta‘yîn olunan cem‘an altı bin altı yüz akçeyi mezbûre Rukiye Hatun’a edâ ve teslîm ol dahi yedinden ba‘de’l-kabz hukūk-ı zevciyyete ve sâir beynlerinde cereyân eden ahz u i‘tâya müte‘allika âmme-i da‘vâdan mezbûr el-Hâc Ali’nin zimmetini bizim huzûrumuzda ibrâ-i âmm-ı râfi‘u’l-hısâm ile ibrâ ve iskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı [şehâdet-i] şer‘iyye ettiğinde gıbbe’t-ta‘dîl ve’t-tezkiye şehâdetleri makbûle olmağın mûcebince müdde‘iyye-i mezbûre Rukiye Hatun’u bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’l-ışrîn min-şehri Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mustafa Çelebi b. Hasan, İmâm Mehmed Efendi b. Osman, Müezzin Mehmed Çelebi b. Süleyman, İsmail Çelebi b. Hüseyin, İbrahim Çelebi b. Mustafa.