Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 318 Hüküm no: 312 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin ümm-i veledi Emetullah bt. Abdullah’ı azat ettikten sonra onunla evlendiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i şerîf-i enverden me’zûnen irsâl olunan Mevlânâ Mustafa Efendi b. el-merhûm Yunus Efendi mahmiye-i İstanbul’da Kadıçeşmesi kurbünde Âbidçelebi Mahallesi ahâlîsinden sâbıkā mahmiye-i mezbûre kādısı olup bâ-fermân-ı âlî Limni cezîresinde sâkin fahrü’l-mevâliyyi’l-izâm İbrahim Efendi b. Benekli Mehmed Efendi b. Abdülcelil tarafından husûs-ı âti’l-beyânda kabûlüne mevkūfe vekâlet ile vekîl olduğu Dergâh-ı âlî -dâme mahfûfen bi’l-me‘âlî- yeniçerilerinin on ikinci cemâ‘ate mahsûs oda neferâtından Mahmud Beşe b. Mustafa ve Ebûbekir Beşe b. Hasan nâm kimesneler şehâdetleriyle mahzar-ı hasm-ı câhidde sâbit ve sübût-ı vekâlete hükm-i şer‘-i lâhık olan Mustafa Çelebi b. Mehmed nâm kimesne meclis-i ma‘kūd-ı mezkûrda müvekkil-i mûmâ-ileyhe rıkkını mu‘terife olan orta boylu, açık kaşlı, gök elâ gözlü Rusiyyetü’l-asl Müslimetü’l-mille ümm-i veledi işbu bâ‘isetü’l-vesîka Emetullah bt. Abdullah mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh İbrahim Efendi ber-vech-i muharrer beni vekîl etmekle ben dahi ba‘de’l-kabûli’l-vekâle mevsûfe-i mezbûreyi bi’l-vekâle hasbeten lillâhi te‘âlâ mâlından tahrîr ve i‘tâk ve kayd-ı rıkdan ıtlâk eyledim min-ba‘d mevsûfe-i mezbûre sâir harâir-i asliyyât gibi hürre olup müvekkil-i mûmâ-ileyhin mevsûfe-i mezbûre üzerinde velâdan gayrı nesne hakkı bâkī kalmadı dedikde gıbbe’t-tasdîkı’ş-şer‘î zâtı ta‘rîf-i şer‘î ile mu‘arrefe olan mezbûre Emetullah Hatun meclis-i mezkûrda vekîl-i mezbûr Mustafa Çelebi mahzarında ikrâr ve takrîr-i kelâm edip yüz çarh? altını mehr-i müecceli tesmiyesiyle lede’ş-şuhûd nefsimi müvekkil-i mûmâ-ileyh İbrahim Efendi’ye akd ve tezvîc eylediğimde vekîl-i mezbûr Mustafa Çelebi ber-vech-i muharrer bi’l-vekâle tezevvüc ve kabûl eyledi dedikde vekîl-i mezbûr mukırre-i mezbûre Emetullah Hatun’u cemî‘ kelimât-ı meşrûhasında vicâhen ve şifâhen bi’l-vekâle tahkīk ve tasdîk eylediğini mevlânâ-yı mezbûr mahallinde ketb ü tahrîr ve ma‘an irsâl olunan Salih Çelebi b. Süleyman ve Molla Ali b. Mahmud nâm kimesneler ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Mustafa, Hüseyin Beşe b. Ahmed, el-Hâc Ali b. İlyas, Mehmed Efendi b. İshak el-imâm, Molla Mehmed b. Mustafa el-müezzin, Ali Efendi b. Mehmed, Çukadâr Mehmed Ağa b. İbrahim, Ahmed Çelebi b. Mehmed.