Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 319 Hüküm no: 313 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin eşi Emetullah bt. Abdullah’ı kendi işleri için vekil ve çocukları üzerine vasi tayin ettiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i şerîf-i enverden me’zûnen irsâl olunan mevlânâ başkâtibimiz Mustafa Efendi b. el-merhûm Yunus Efendi mahmiye-i İstanbul’da Kadıçeşmesi kurbünde Âbidçelebi Mahallesi ahâlîsinden sâbıkā mahmiye-i mezbûre kādısı olup bâ-fermân-ı âlî Limni cezîresinde sâkin fahrü’l-mevâliyyi’l-izâm İbrahim Efendi b. Benekli Mehmed Efendi b. Abdülcelil tarafından husûs-ı âti’l-beyânda kabûlüne mevkūfe vekâlet ile ve uhrâyı tevkîle dahi vekîl olduğu Dergâh-ı âlî -dâme mahfûfen bi’l-me‘âlî- yeniçerilerinin on ikinci cemâ‘ate mahsûs oda neferâtından Mahmud Beşe b. Mustafa ve Ebûbekir Beşe b. Hasan nâm kimesneler şehâdetleriyle mahzar-ı hasm-ı caddede [câhidde] sâbit ve sübût-ı vekâlete hükm-i şer‘-i lâhık olan Mustafa Çelebi b. Mehmed nâm kimesne mesclis-i ma‘kūd-ı mezkûrda müvekkil-i mûmâ-ileyhin zevce-i menkûhası bâ‘isetü’l-vesîka Emetullah bt. Abdullah nâm hatun mahzarında bi’l-vekâle takrîr-i kelâm ve bast-ı merâm edip müvekkil-i mûmâ-ileyh mahmiye-i mezbûrede vâki‘ cemî‘ umûrunu rü’yet ve ikāmete tarafından mezbûre Emetullah Hatun’ı vekîl ve nâib-i menâb ve bi-emri’llâhi te‘âlâ vedâ‘-ı a‘lem-i fânî eylediğimde cemî‘ terekesini ahz u kabz ve düyûn-ı müsbetesini ashâbına ba‘de’l-kazâ sümün hisse-i irsiyyesini ahz u kabz eylediğinden sonra firâşından hâsıl ve kendiden mütevellid evlâdı İsmail ve Ümmügülsüm nâm sagīrlerin hisse-i irsiyyelerini hadd-i bülûğ ve rüşd-i sedâdlarına değin zabt u hıfza mezbûre Emetullah Hatun’u vasiyy-i muhtâr nasb ve ta‘yîn eylediğimde ol dahi zikrolunan vekâlet ve vesâyeti kabûl ve merâsimini edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan olunan Salih Çelebi b. Süleyman ve Molla Ali b. Mehmed nâm kimesneler ile meclis-i şer‘a gelip her biri alâ-vukū‘ihî inhâ etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Mustafa, el-Hâc Ali b. İlyas, Mehmed Çelebi b. Şa‘ban, Mahmud Efendi b. İshak el-imâm, Molla Mehmed b. Mustafa el-müezzin, Ali Efendi b. Mehmed, Çukadâr Mehmed Ağa b. Ahmed, Ahmed Çelebi b. Mehmed, Hüseyin Beşe b. Ahmed.