Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 323 Hüküm no: 319 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband esnafının Şark seferi için aralarında topladıkları paradan dolayı Usta Yusuf b. Abdullah, Hüseyin b. Abdullah ve Ali Bey b. Abdurrahman ile olan davalarında sulh oldukları Na‘lband esnâfının hüccetidir. Mahmiye-i İstanbul’da na‘lbandlar hırfetine kethüdâ olan Ahmed Ağa b. İvaz ve Yiğitbaşı es-Seyyid Ahmed Çelebi ve ustalardan el-Hâc Muslu b. Usta Hasan ve Mehmed Çelebi b. Mustafa ve Ali Odabaşı ve es-Seyyid Halil Çelebi nâm kimesneler meclis-i şer‘-i şerîf-i enverde hırfet-i mezkûre erbâbından ashâbü’l-kitâb Usta Yusuf b. Abdullah ve Hüseyin b. Abdullah ve Ali Bey b. Abdurrahman nâm kimesneler mahzarlarında her biri ikrâr ve takrîr-i kelâm edip işbu sene-i mübârekede şark cânibine sefer-i hümâyûn mukarrer olup İstanbul esnâfından ordu ihrâcı fermân buyrulmağın hırfetimizin dört aded haymesi olup zikrolunan haymelere mezkûrûn Yusuf ve Hüseyin ve Ali’yi taraflarımızdan vekîl nasb ve ta‘yîn edip esnâf-ı mezkûre erbâbından ve mülhaklarımızdan cem‘ ve tahsîl eylediğimizden zikrolunan dört hayme mühimmâtına sarf etmek üzere dört yüz guruş mezkûrûna def‘ ve teslîm eyleyip onlar dahi ba‘de’l-kabz Üsküdar sahrâsında Ordu-yı hümâyûna mu‘tâd-ı kadîm üzere hizmet ederlerken sefer-i hümâyûn meks olunmağla medfû‘umuz olan meblağ-ı mezkûr dört yüz guruşu mezbûrûndan taleb eylediğimizde cevâblarında makbûzumuz olan meblağ-ı mezkûr dört yüz guruşdan ziyâde altmış dört guruş masrûfumuz vardır deyü def‘le cevâb vermeleriyle el-hâletü hâzihî medfû‘umuz olan dört yüz guruş mütâlebesinden fâriğler olup onlar dahi ziyâde masrûfları olan altmış dört guruşa müte‘allika da‘vâdan fâriğler olup ba‘de’l-yevm her birimizin âhar ile husûs-ı mezbûra müte‘allika da‘vâ ve nizâ‘ımız kalmayıp kat‘-ı nizâ‘ eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Kethüdâ Mehmed Ağa b. Mehmed, Tahtacı Mehmed Çelebi b. Abdullah, Mehmed Çelebi b. Abdurrahman, Süleyman Çelebi b. Mustafa, Hüseyin Çelebi b. Hasan.