Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 323 Hüküm no: 320 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Semerci esnafının Şark seferi için aralarında topladıkları paradan dolayı Ahmed Çelebi b. Ali, Süleyman b. Mehmed ve Mehmed Çelebi b. Abdullah ile olan davalarında sulh oldukları Mahmiye-i İstanbul’da semerciler hırfetinin kethüdâsı olan İbrahim Çelebi b. ( ) ve Yiğit[başısı] Yusuf Çelebi b. Osman ve ustalardan Ali Çelebi b. Mustafa ve el-Hâc Ali b. Hüseyin nâm kimesneler meclis-i şer‘-i şerîf-i enverde hırfet-i mezkûre erbâbından ashâbü’l-kitâb Ahmed Çelebi b. Ali ve Süleyman b. Mehmed ve Mehmed Çelebi b. Abdullah nâm kimesneler mahzarında her biri ikrâr ve takrîr-i kelâm edip işbu sene-i mübârekede şark cânibine sefer-i hümâyûn mukarrer olup İstanbul esnâfından ordu ihrâcı fermân buyrulmağın hırfetimizin üç aded haymesi olup zikrolunan haymelere mezkûrûn Ahmed ve Süleyman ve Mehmed’i taraflarımızdan vekîl nasb ve ta‘yîn edip esnâf-ı mezkûre erbâbından ve mülhaklarımızdan cem‘ ve tahsîl eylediğimizden zikrolunan üç aded hayme mühimmâtına sarf etmek üzere yüz elli guruş def‘ ve teslîm edip onlar dahi ba‘de’l-kabz Üsküdar sahrâsında Ordu-yı hümâyûna mu‘tâd-ı kadîm üzere hizmet ederlerken sefer-i hümâyûn meks olunmağla medfû‘umuz olan meblağ-ı mezkûr yüz elli guruşu taleb eylediğimizde cevâblarında makbûzumuz olan meblağ-ı mezkûr yüz elli guruşdan ziyâde altmış guruş masrûfumuz vardır deyü def‘le mukābele etmeleriyle el-hâletü hâzihî mezkûrun medfû‘umuz olan meblağ-ı mezkûr yüz elli guruş mütâlebesinden fâriğler olup onlar dahi ziyâde masrûfları olan altmış guruş mütâlebesinden fâriğler olup ba‘de’l-yevm her birimiz âhar ile husûs-ı mezkûra müte‘allika da‘vâmız kalmayıp kat‘-ı nizâ‘ eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Cemâziyelâhir li-sene selâse ve erba‘în ve mi’e ve elf. Şuhûdü’l-hâl: Kethüdâ Mehmed Ağa b. Mehmed, Kebeci Mehmed Ağa b. Abdullah, Mehmed Çelebi b. Abdullah, Süleyman Çelebi b. Mustafa, Hüseyin Çelebi b. Hasan.