Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 324 Hüküm no: 321 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma b. Abdullah’ın evindeki hissesini ve bazı eşyalarını kızı Sâliha bt. el-Hâc Mehmed’e sattığı Mahmiye-i İstanbul’da İbrahimpaşa Mahallesi’nde sâkine Fâtıma bt. Abdullah nâm hatun zâtı dâmâdı Ebûbekir Ağa b. Ahmed ve es-Seyyid Mehmed Çelebi b. Halil ta‘rîfleriyle mu‘arrefe olan mezbûre Fâtıma Hatun meclis-i şer‘-i şerîf-i enverde sadriye kebîre kızı olup yine mu‘arrifân-ı mezbûrân ta‘rîfleriyle mu‘arrefe olan bâ‘isetü hâzihi’l-vesîka Sâliha bt. el-Hâc Mehmed nâm hatun mahzarında ikrâr ve takrîr-i kelâm edip bey‘-i âti’z-zikrin sudûruna değin kızım mezbûre Sâliha Hatun ile ale’l-iştirâki’s-seviyy silk-i mülk-i sahîhimizde münselik olup mahalle-i mezbûrede vâki‘ bir tarafdan Abdullah Çelebi b. el-Hâc Mehmed menzili ve bir tarafdan Hisar bostanı demekle ma‘rûf bostan ve bir tarafdan Kapıcızâde Şehrî Mehmed Ağa menzili ve bir tarafdan tarîk-i hâs ile mahdûd üç bâb tahtânî oda ve bir sofa ve kenîf ve bi’r-i mâ ve eşcâr-ı müsmire ve gayr-ı müsmireli bahçeyi müştemil mülk menzilden benim hissem olan nısf-ı şâyi‘i cem‘î tevâbi‘ ve levâhıkı ile otuz guruşa ve hâlâ yedimde mülk ve hakkım olup mecmû‘u yirmi guruş kıymetli yün ile memlû altı aded beledî yastık ve iki minder ve bir döşek ve bir tencere ve iki sahan ve bir lenger ve bir tâbemi yirmi guruşa tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile kızım mezbûre Sâliha Hatun’a bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eyledikden sonra semenleri olan meblağayn-ı mezkûreyn elli guruşu mezbûre Sâliha Hatun yedinden tamamen ahz u kabz eyledim. Fîmâ-ba‘d menzil-i mahdûd-ı mezkûrun mecmû‘u ve eşyâ-i muharrere-i merkūme kızım mezbûre Sâliha Hatun’un mülk-i müşterâları olmuşdur. Keyfemâ-yeşâ ve yahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mustafa Efendi b. Abdullah imâm-ı mahalle-i mezbûr, Abdi Efendi b. İsmail, Şehrî Mehmed Ağa b. Süleyman, Ebûbekir Ağa b. Ahmed, Zeytincizâde Salih Çelebi, es-Seyyid Mehmed Çelebi b. es-Seyyid Halil, Mehmed Çelebi b. Abdullah tahtacı, Ya‘kub . Abdullah muhzır.