Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 325 Hüküm no: 322 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Danişmendli mukataası mutasarrıfı Süleyman Efendi ile bazı cemaatlerin mukataadan dolayı aralarında olan davada sulh oldukları Vilâyet-i Anadolu’da vâki‘ Danişmendli mukāta‘ası cemâ‘atlerinden olup Mahmiye-i İstanbul’da müsâfiren sâkin Karalı cemâ‘atinden Molla Veli b. Hüseyin ve Göleyir? cemâ‘atinden Ömer b. Salih ve Sermâyeli cemâ‘atinden Süleyman b. Murtaza ve Cerid cemâ‘atinden Veli b. Yusuf ve Kaşıkçı cemâ‘atinden Seydî Ahmed b. İvaz ve Civânşir cemâ‘atinden Ebûbekir b. Hızır ve Büyük Salmanlı cemâ‘atinden İvaz b. Abdüsselam nâm kimesneler meclis-i şer‘-i şerîf-i enverde mukāta‘a-i mezkûreye ber-vech-i mâlikâne mutasarrıf olan sâbıkā arpa emîni mefâhir-i erbâbi’t-tahrîr ve’l-kalem bâ‘isü hâze’l-kitâb Süleyman Efendi b. Mustafa b. Abdülmennan tarafından husûs-ı âti’l-beyâna vekîl olduğu Mahmud Ağa b. Ömer ve Fazlullah Çelebi b. Ahmed şehâdetleriyle sâbit olan Çukadâr Ali Bey b. Mehmed mahzarında her biri takrîr-i kelâm ve bast-ı merâm edip müvekkil-i mûmâ-ileyh zikrolunan mâlikânenin bedel-i iltizâmı on ikişer bin guruş iken dokuz seneden berü her sene on üç bin beş yüz guruşa âhara ilzâm edip sinîn-i mezkûrede üç bin beş yüz guruşumuzu ziyâde ahz u kabz etmişidi deyü arzuhâl-birle ziyâde-i mezkûre[yi] taleb ve da‘vâya tasaddî eylediğimizde ba‘de vukū‘ı’l-münâza‘a muslihûn tavassutuyla müvekkil-i mûmâ-ileyh zikrolunan mâlikâneyi fîmâ-ba‘d kadîmden bedel-i iltizâmı olan on ikişer bin guruşa her sene mu‘temedün-aleyh kimesnelere ilzâm edip ziyâdeye ilzâm etmemek üzere ta‘ahhüd eylediğinde biz dahi da‘vâ-yı mezkûrumuzdan fâriğ olup müvekkil-i mûmâ-ileyhi ibrâ-i âm ile ibrâ ve iskāt eyledik dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Du‘âcı İbrahim b. Muslu, Duhânî Mehmed b. Ahmed, Abdullah b. Mustafa.