Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 326 Hüküm no: 323 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hanım’ın zenci kölesi Rahime bt. Abdullah’ı anlaşmalı olarak azat ettiği (Mükâtebe) Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Bostanzâde es-Seyyid Ahmed Efendi Mahmiye-i İstanbul’da Sultan Ahmed Hân Câmi‘-i şerîfi kurbünde Güngörmez Mahallesi’nde fahrü’l-muhadderât Sâliha Hanım bt. el-merhûm Bahri Paşa’nın sâkine olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mûmâ-ileyhâ Sâliha Hanım tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Halil Efendi b. el-Hâc İbrahim ve Mehmed Efendi b. Ahmed nâm kimesneler şehâdetleriyle şer‘an sâbit olan el-Hâc Mehmed b. el-Hâc Kasım nâm kimesne meclis-i ma‘kūd-ı mezkûrda müvekkile-i mezbûreye rıkkını mu‘terife olan uzun boylu, açık kaşlı zenciyyetü’l-asl Müslimetü[‘l-mille] [bâ‘isetü] hâzihi’l-vesîka Rahime bt. Abdullah mahzarında bi’l-vekâle ikrâr-ı tâm ve takrîr-i kelâm edip müvekkil-i mûmâ-ileyhâ Sâliha Hanım mevsûfe-i mezbûre Rahime’yi târih-i kitâbdan üç sene tamamına değin kendiye hizmet edip ba‘dehû âzâd olmak üzere kitâbete kat‘ eylediğinde ol dahi kabûl ve ber-vech-i muharrer hizmet etmek üzere ta‘ahhüd eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr İbrahim Çelebi b. Ahmed ve Muhzır İbrahim b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Ali, Mehmed Çelebi b. el-Hâc Hasan, Hasan Çelebi b. Abdullah, İbrahim Çelebi b. Ahmed, diğer İbrahim b. Ahmed, Kādızâde İbrahim Çelebi, Salih b. Süleyman, Mehmed Çelebi b. Abdullah, Ya‘kub b. Abdullah, Abdullah Çelebi b. Mustafa.