Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 326 Hüküm no: 324 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa ve kardeşi Ahmed Ağa ile Yedekçi Mehmed Ağa’nın Pınarhisar cizyesinden dolayı aralarındaki alacak davasında sulh oldukları Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Uzun Şücâ‘ Mahallesi’nde sâkin umdetü’l-eşbâh ve’n-nezâir Yedekçi Mehmed Ağa b. Muslu Bey b. Abdullah’ın menziline varıp zeyl-i kitâbda muhârrerü’l-esâmî Müslimîn mahzarlarında akd-i meclis-i şer‘-i şerîf ettikde mahmiye-i mezbûrede Tavukpazarı kurbünde Kıblelizâde Hanı’nda müsâfiren sâkinler olan Mustafa Ağa ve karındaşı Ahmed Ağa b. el-Hâc Halil nâm kimesneler meclis-i ma‘kūd-ı mezkûrda bâ‘isü hâze’l-kitâb mûmâ-ileyh Yedekçi Mehmed Ağa tarafından husûs-ı âti’l-beyâna vekîl olduğu Ali Ağa b. Mehmed ve Mustafa Bey b. Ahmed şehâdetleriyle sâbit ve sübût-ı vekâlete hükm-i şer‘î lâhık olan Osman Ağa b. Mehmed mahzarında her biri ikrâr ve takrîr-i kelâm edip târih-i kitâbdan bir sene mukaddem Pınarhisarı ve tevâbi‘i cizyesi husûsi’çün ubûdiyyet olmak üzere müvekkil-i mûmâ-ileyhe altı bin yetmiş altı guruş def‘ ve teslîm ol dahi yedimizden ber-vech-i muharrer ahz u kabz ve istihlâk etmeğin meblağ-ı mezbûru müvekkil-i mûmâ-ileyhden taleb ve da‘vâ ve ba‘de vukū‘ı’l-münâza‘a beynimize muslihûn tavassut edip da‘vâ-yı mezkûremizden bizi müvekkil-i mûmâ-ileyh ile bin beş yüz guruş üzerine sulh eylediklerinde biz dahi sulh-ı mezbûru kabûl ve bedel-i sulh-ı mezkûr bin beş yüz guruşu vekîl-i mezbûr yedinden tamamen ahz u kabz eylediğimizden [sonra] husûs-ı mezkûra ve târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan her birimiz âharı ibrâ-i âmm-ı râfi‘u’l-hısâm ile ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Çukadâr İsmail Çelebi b. Mehmed ve Muhzır Mahmud b. Hüseyin ile meclis-i şer‘a [gelip] her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Hacı Hüseyin Çavuş el-mübâşir, Süleyman Ağa b. Abdulkādir, Abdurrahman Ağa b. Mustafa, Ali Ağa b. Mehmed, Veli Bey b. Hüseyin tâbi‘-i mübâşir, Mehmed Bey b. Şa‘ban tâbi‘-i mezbûr, Mustafa Bey b. Abdullah tâbi‘-i mezbûr, Osman Bey b. Mehmed tâbi‘-i Mustafa Ağa, Ali Çelebi b. Mehmed ve Molla Mehmed b. Halil Efendi.