Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 327 Hüküm no: 325 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul eski kadılarından olup Limni adasında sürgünde olan İbrahim Efendi’nin arsasını Kethüda Ahmed Efendi’ye sattığı Husûs-ı âti’l-beyânın mahallinde ketb ü tahrîri bi’l-iltimâs savb-ı şer‘-i kavîmden irsâl olunan Mevlânâ es-Seyyid Fazlullah b. Abdülkerim bundan akdem erîke-i fetvâ olan fazîletlü sa‘âdetlü Abdullah Efendi hazretlerinin mahmiye-i İstanbul’da Sultan Ahmed Câmi‘-i şerîfi kurbünde sâkin oldukları sa‘âdet-hânelerine varıp zeyl-i kitâbda muhârrerü’l-esâmî Müslimîn huzûrlarında akd-i meclis-i şer‘-i şerîf ettikde bundan akdem İstanbul kādısı olup hâlâ cezîre-i Limni’de menfiyyen sâkin İbrahim Efendi b. Benekli Mahmud Efendi b. Abdurrahman taraflarından zikri âtî bey‘-i ikrâra vekîl olduğu hâlâ mahmiye-i mezbûrede çörekçiler kethüdâsı Mehmed Ağa b. Mustafa ve es-Seyyid Hüseyin Çelebi b. es-Seyyid Hasan nâm kimesne şehâdetleriyle sâbit olan kethüdâsı el-Hâc Ali b. Hüseyin nâm kimesne meclis-i ma‘kūd-ı mezkûrda müşârun-ileyh Abdullah Efendi hazretlerinin kethüdâlık hizmetleriyle şeref-yâb olan umdetü’l-kuzât bâ‘isü hâze’l-kitâb Ahmed Efendi b. Osman Efendi mahzarında bi’l-vekâle ikrâr ve takrîr-i kelâm edip müvekkilim-i mûmâ-ileyh İbrahim Efendi târih-i kitâbdan üç ay kazâsı hâlinde yedinde mülk ve hakkı olan mahmiye-i mezbûrede Tevkī‘î Ca‘fer Mahallesi’nde vâki‘ bir tarafdan sâbıkā Revan kādısı iken vefât eden merhûm Sahaf Ali Efendi veresesi mülkleri ve bir tarafdan Solak Ahmed Beşe menzili ve bir tarafdan Âişe nâm hatun ve bir tarafdan tarîk-i âm ile mahdûd bi-hesâb-ı terbî‘i üç yüz altmış zirâ‘ muhterik mülk menzil arsasını tarafeynden îcâb ve kabûlü hâvî bey‘-i bâtt-ı sahîh-i şer‘î müşârun-ileyh Kethüdâ Ahmed Efendi hazretlerine iki yüz seksen yedi buçuk guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz eylediklerinden sonra semeni olan meblağ-ı mezbûr iki yüz seksen yedi buçuk guruşu târih-i merkūmda yedinden tamamen ahz u kabz etmeleriyle arsa-yı mahdûde-i mezbûre târih-i merkūmdan berü mûmâ-ileyh Kethüdâ Ahmed Efendi hazretlerinin mülk-i müşterâları olup müvekkilim-i mûmâ-ileyh İbrahim Efendi’nin kat‘â alâka ve medhali kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan İbrahim b. Kadri ve Muhzır Salih b. Süleyman ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Eş-şeyh Mehmed Efendi b. Ali, İsmail Çelebi b. Süleyman, Salih Çelebi b. Süleyman, Hasan Çelebi b. Ahmed, Ahmed Çelebi b. Mehmed, Ahmed Çelebi b. Abdullah, İbrahim b. Abdulkādir.