Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 328 Hüküm no: 326 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aklı yerinde olmayan cariyeyi Na‘ima Halil Efendi’ye satan Esirci Mehmed’in cariyenin bedelini iade etmesi Mahmiye-i İstanbul’da Eminbey Mahallesi’nde sâkin Na‘ima Halil Efendi b. İbrahim b. Mehmed nâm kimesne tarafından husûs-ı âti’l-beyânda vekîl olduğu Mustafa Çelebi b. Ahmed ve İbrahim Çelebi b. Receb nâm kimesneler şehâdetleriyle vekâleti sâbit olan işbu bâ‘isü’l-kitâb Mehmed Çelebi b. Süleyman nâm kimesne meclis-i şer‘-i hatîr-i lâzımü’t-tevkīrde esîrci tâifesinden Mehmed b. İbrahim nâm kimesne mahzarında bi’l-vekâle üzerine da‘vâ ve takrîr-i kelâm edip mezbûr Esîrci Mehmed târih-i vesîkadan on altı gün mukaddem cemî‘ uyûbdan sâlime olmak üzere işbu orta boylu, açık kaşlı, gök elâ gözlü Rusiyyetü’l-asl Müslimetü’l-mille Fâtıma nâm câriye-i memlûkesini iki yüz doksan guruş semen-i makbûza müvekkilim mezbûr Na‘ima Halil Efendi’ye bey‘ ve teslîm ol dahi ba‘de’l-iştirâ câriye-i mezbûre cünûn marazıyla mu‘ayyibe ve ayb-ı mezkûr mevsûfe-i mezbûrede kadîmî olup abdü’n-neccâr [inde’t-tüccâr] noksan semen îcâb eder uyûbdan olmağla suâl olunup mevsûfe-i mezbûreyi red ve semen-i mezbûru bana teslîme mezbûr Esîrci Mehmed’e tenbîh olunması bi’l-vekâle matlûbumdur dedikde evvelâ teveccüh-i husûmet için mevsûme-i mezbûre bâ-fermân-ı âlî ehl-i hibre ta‘yîn olunan hâssa etibbâlarından Hasan Efendi b. Ali ve es-Seyyid Ahmed b. İbrahim nâm kimesnelere irâet olundukda onlar dahi ba‘de’l-irâe câriye-i mezbûre cünûn marazıyla marîza olduğunu ihbâr etmeleriyle gıbbe’s-suâl mezbûr Mehmed câriye-i mezbûreyi târih-i kitâbdan on altı gün mukaddem müvekkil-i mezbûra semen-i makbûz iki yüz doksan guruşa cemî‘ uyûbdan sâlime olmak üzere bey‘ ve teslîm eylediğini ikrâr ve ayb-ı mezbûrun kadîmîni inkâr etmekle vekîl-i mezbûrdan müdde‘âsına mutâbık beyyine taleb olundukda mezbûrân Hasan Efendi ve es-Seyyid Ahmed Efendi li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka câriye-i mezbûre cünûn marazıyla marîza olup ve maraz-ı mezbûre mevsûfe-i mezbûrede on altı günden akdem hâdis olmuş değildir on altı günden kadîmdir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde müvekkil-i mezbûr ba‘de’t-tahlîfü’ş-şer‘î mûcebince ve ba‘de’l-hükm meblağ-ı mezbûru müvekkil-i merkūma red ve teslîme mezbûr Mehmed’e tenbîh-birle mâ-vaka‘a bi’t-taleb ketb olundu. Hurrire fî-18 Recebi’l-ferd sene [1]143. Şuhûdü’l-hâl: es-Seyyid Ebûbekir b. Ahmed, es-Seyyid Yusuf Çelebi b. Ebûbekir, Mehmed Çelebi b. Abdullah, Kādızâde Mustafa Çelebi b. İbrahim, Sarımsakçızâde Ahmed Çelebi.