Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 182 Hüküm no: 189 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un eşi İbrahim’den muhâlaa yoluyla boşandığı Medîne-i Üsküdar’da Mirâhur mahallesi sâkinelerinden olup zâtı İbrahim Beşe b. Osman ve Mustafa Beşe b. Ramazan nâm kimesneler ta‘rîfleriyle mu‘arrefe olan Zeyneb bt. Osman nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-vesîka İbrahim b. Ahmed nâm kimesne mahzarında ikrâr ve takrîr-i kelâm edip mezbûr İbrahim zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütekarrir ve ma‘kūdün-aleyh olan dört bin sekiz yüz akçe mehr-i müeccelim üzerine muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl zevciyete müte‘allıka âmme-i de‘âvî ve kâffe-i mutâlebât ve eymân [ve] muhâsamâtdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Ahmed Beşe b. Osman, Ahmed Efendi b. Mehmed, Mustafa b. Halil, el-Hâc Hanefi b. Ali, Mustafa b. Ramazan, es-Seyyid Mehmed Çelebi b. Abdullah, es-Seyyid Süleyman b. Mehmed, Mustafa Beşe b. Abdullah, Türk Mustafa Beşe b. Abdullah.