Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 183 Hüküm no: 190 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Karagöz’ün bağını kardeşinin oğlu İsayi’ye sattığı Fi’l-asl vilâyet-i Anadolu’da Niğde ahâlîsinden olup mahmiye-i İstanbul’da müsâfiren sâkin Yağcı Karagöz v. İstenker? nâm zimmî medîne-i Üsküdar’da meclis-i şer‘-i şerîf-i enverde işbu râfi‘ü’s-sifr karındaşı oğlu İsayi v. Yuvan nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup Niğde’de Andaval nâm mahâlde vâki‘ bir tarafdan Osman Çelebi bağı ve bir tarafdan Karyağdı bağı ve bir tarafdan İbrahim Ağa [bağı] ve tarîk-i âm ile mahdûd bir kıt‘a kürûmu mülk bağımı tarafeynden îcâb ve kabûlü hâvî bey‘-i sahîh-i şer‘î ile on guruşa mesfûr İsayi zimmîye bey‘ ü temlîk ve mahallinde kabza taslît eylediğimde ol dahi ber-vech-i muharrer iştirâ ve temellük ve kabûl eyledikden sonra meblağ-ı merkūm on guruşu mesfûr İsayi zimmî yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden bağ-ı mezkûrda benim kat‘â alâka- ve medhalim kalmayıp mesfûr İsayi zimmînin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Saferi’l-hayr li-seneti ihdâ ve hamsîn ve mi’ete ve elf. [58a] Şuhûdü’l-hâl: Mustafa Bey b. Ahmed, es-Seyyid Süleyman b. Mehmed, Hasan Bey b. Ramazan, İsa Beşe b. Musa. Madallı Aci Dumacinioğlu Vasil, Andavallı Ezriye Nikola.