Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 329 Hüküm no: 327 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ziştovi kasabasından el-Hâc Hüseyin Ağa’nın el-Hâc Mustafa b. Abdullah üzerine açtığı alacak davasında haksız olduğu <> Vilâyet-i Rumeli’nde vâki‘ Ziştovi kasabası ahâlîsinden olup mahmiye-i İstanbul’da Hocapaşa Mahallesi’nde sâkin el-Hâc Hüseyin Ağa b. el-Hâc Mehmed meclis-i şer‘-i hatîr-i lâzımü’t-tevkīrde işbu bâ‘isetü’l-vesîka el-Hâc Mustafa b. Abdullah mahzarında üzerine da‘vâ ve takrîr-i kelâm edip bundan akdem eşyâ-i memlûkemden adedi beynimizde ma‘lûm dört yüz guruş kıymetli dülbend sarıklarımı âhara bey‘ edivermek için bi’l-emâne mezbûr el-Hâc Mustafa’ya def‘ ve teslîm ol dahi ber-vech-i muharrer yedimden ba‘de’l-kabz zikrolunan sarıklar mevcûd ise ayınlarını müstehlek ise ba‘de’s-sübût kıymet-i şer‘iyyelerini ve kazâ-i mezkûre re‘âyâsı üzerlerine edâsı lâzım gelen evrâkı zikrolunan re‘âyâya tevzî‘ ve taksîm ve cizyelerini cem‘ ve tahsîl ve bana teslîm etmek üzere mezbûr el-Hâc Mustafa’yı müddet-i ma‘lûme otuz guruşa istîcâr ol dahi ber-vech-i muharrer nefsini bana îcâr etmeğin meblağ-ı mezkûr otuz guruşdan ziyâde mezkûrûn re‘âyâdan bi-gayr-ı hakkın yirmi iki buçuk guruş dahi ahz u kabz etmeğin mezbûr el-Hâc Mustafa’ya suâl olunup kıymet-i mezkûr ile meblağ-ı mezbûru bana def‘ ve teslîme tenbîh olunması matlûbumdur dedikde gıbbe’s-suâl mezbûr el-Hâc Mustafa cevâbında müdde‘î-i mezbûr iddi‘â eylediği bir heybe içinde mevcûd adedi ma‘lûmum olmayan sarıklarını ber-vech-i muharrer bey‘ için bi’l-emâne bana def‘ ve teslîm ben dahi yedinden ahz u kabz eyledikden sonra bilâ-ta‘ad yedimden zâyi‘ olmuşdur deyü def‘ edicek mezbûr el-Hâc Mustafa husûs-ı mezkûrda yemîni ile tasdîk olunur makbûlesinden olup meblağ-ı mezkûr yirmi iki buçuk guruş da‘vâsına müdde‘î-i mezbûr ehil olmamağın tahlîfe dahi taleb olmamağın mezbûr el-Hâc Hüseyin Ağa bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Salih Çelebi b. Süleyman, İbrahim Çelebi b. Mustafa, Ahmed Çelebi b. Mehmed, Mustafa b. Abdullah.