Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 183 Hüküm no: 191 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un eşi Hasan Beşe’den muhâlaa yoluyla boşandığı Medîne-i Üsküdar’da Selami Ali Efendi [mahallesi] sâkinlerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. Mustafa nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-vesîka Hasan Beşe b. Mehmed nâm kimesne mahzarında ikrâr ve takrîr-i kelâm edip mezbûr Hasan Beşe zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütekarrir ve ma‘kūdün-aleyh olan altı bin akçe mehr-i müeccelimden fâriğa olup nafaka ve hamâlimden ve meûnet-i süknâm dahi kendi üzerime olmak üzere zevcim mezbûr Hasan Beşe ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebât ve eymân [ve] muhâsamâtdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Mustafa Beşe b. Durmuş, es-Seyyid Süleyman b. Mehmed, Hasan Bey b. Ramazan, Osman Bey b. Ahmed, el-Hâc Hanefi b. Ali, Mustafa Bey b. Ahmed, İsa Beşe b. Musa, Sarı Mehmed b. Abdullah, Mehmed Efendi b. Ahmed, İsmail Ağa b. Veli.