Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 185 Hüküm no: 193 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çelebi’nin evini müştemilatıyla birlikte Rukiye Hatun’a sattığı Medîne-i Üsküdar’da Turbâli mahallesi sâkinlerinden Halil Çelebi b. Abdurrahman nâm kimesne meclis-i şer‘-i şerîf-i enverde işbu râfi‘atü’l-vesîka Rukiye bt. Mustafa nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ bir tarafdan İbrahim Çelebi mülkü ve bir tarafdan Gürcü Hasan Ağa bahçesi ve iki tarafdan tarîk-i âm ile mahdûd bir bâb fevkānî oda ve bir tahta-pûş ve bir sofa üç bâb tahtânî oda ve bir sarnıç ve bir mikdâr bahçe ve kenîfi müştemil bir bâb mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa mezbûre Rukiye Hatun’a bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra meblağ-ı merkūm yüz guruşu mezbûre Rukiye yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mahdûd-ı mezkûrda benim kat‘â alâka ve medhalim kalmayıp mezbûre Rukiye Hatun’un mülk-i müşterâsı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde [58b] gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Mehmed Ağa b. İbrahim, el-Hâc Hüseyin b. Mahmud, Mustafa Çelebi b. Ebubekir, Ömer Bey b. Süleyman, Mehmed Beşe b. Mustafa, Ali Çelebi b. Receb, Hasan Çelebi b. Ramazan, es-Seyyid Süleyman b. Mehmed.