Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 185 Hüküm no: 194 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Zurnacıoğlu Kiryako’nun tahıl anbarı, samanlık ve harman yeri ile dört tarlasını sattığı Fi’l-asl vilâyet-i Anadolu’da Trabzon sancağında Maçka kazâsına tâbi‘ Kostortos nâm karye sâkinlerinden kazgancı tâifesinden Zurnacıoğlu Kiryako v. Kiryako nâm zimmî medîne-i Üsküdar’da meclis-i şer‘-i şerîf-i enverde işbu râfi‘ü’s-sifr Tavşanoğlu diğer Kiryako v. Kiryako nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir samanlık ve bir serander ve bir harman yerimi tarafeynden îcâb ve kabûlü hâvî bey‘-i bâtt-ı sahîh-i şer‘î ile seksen guruşa mesfûr diğer Kiryako zimmîye bey‘ ü temlîk ve mahallinde kabza taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı merkūm seksen guruşu mesfûr diğer Kiryako zimmî yedinden tamâmen ahz u kabz eyledim dedikde gıbbe’t-tasdîkı’ş-şer‘î yine karye-i mezbûre kurbünde vâki‘ ma‘lûmü’l-hudûd dört kıt‘a tarlalarımı dahi mesfûr diğer Kiryako zimmîye bâ-ma‘rifet-i sâhib-i arz yirmi beş guruş bedel-i makbûz[a] ferâğ ve tefvîz eylediğimde ol dahi ber-vech-i muharrer tefevvüz ve kabûl eyledikden sonra semen-i merkūm seksen guruş ile bedel-i merkūm yirmi beş guruş ki cem‘an yüz beş guruşu mesfûr diğer Kiryako zimmî yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden samanlık ve serendar ve harman yeri mesfûrun mülk-i müşterâsı ve zikri mürûr eden tarlalar hakk-ı sırfı [ve] makbûzu olmuşdur benim kat‘â alâka ve medhalim kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Fındıkoğlu Ahmed Beşe, Musa Beşe b. Sinan, İbrahim Beşe b. Selim. Yarko v. Yogaz, Yorgi v. Sarp, Hostum? v. Maras? Lazari v. Andon.