Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 186 Hüküm no: 195 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Zurnacıoğlu Kiryako’nun anbar ve bahçesini Parkor zimmiye sattığı Fi’l-asl vilâyet-i Anadolu’da Trabzon sancağında Maçka kazâsına tâbi‘ Kostortos nâm karye sâkinlerinden kazgancı tâifesinden Zurnacıoğlu Kiryako v. Kiryako nâm zimmî meclis-i şer‘-i şerîf-i enverde işbu râfi‘ü’s-sifr Parkor v. Yortan nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûrede vâki‘ bir tarafdan müşteri mülkü ve bir tarafdan Akram? oğlu İşkova? mülkü ve iki tarafdan tarîk-i âm ile mahdûd bir bâb anbâr ve bir mikdâr eşcâr-ı müsmire ve gayr-ı müsmireyi hâvî bahçeyi müştemil anbârımı tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi dokuz guruşa mesfûr Parkor zimmîye bey‘ ü temlîk ve mahallinde kabza taslît eylediğimde ol dahi ber-vech-i muharrer iştirâ ve temellük ve kabûl eyledikden sonra meblağ-ı merkūm yirmi dokuz guruşu mesfûr Parkor zimmî yedinden bi’t-tamâm ve’l-kemâl ahz u kabz edip ba‘de’l-yevm zikri mürûr eden anbâr ve bahçede kat‘â alâka ve medhalim kalmayıp mesfûr Parkor zimmînin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: ( ).