Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 188 Hüküm no: 197 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Ahmed Ağa ile muhâlaa yoluyla boşandığı Husûs-ı âti’l-beyânın mahallinde ketb ü tahrîri için savb-ı şer‘-i enverden irsâl olunan Mevlânâ Ahmed Efendi b. Hüseyin Efendi medîne-i Üsküdar’da Hamza Fakıh mahallesinde sâkin es-Seyyid el-Hâc Mehmed Ağa [b.] es-Seyyid el-Hâc Hüseyin’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde menzil-i mezbûrede sâkine Âişe bt. Abdullah nâm hatun zâtı oğlu es-Seyyid el-Hâc Mehmed Ağa ve es-Seyyid Mustafa Çelebi b. Mehmed nâm kimesneler ta‘rîfleriyle mu‘arrefe oldukdan sonra meclis-i ma‘kūd-ı mezkûrda zevc-i muhâli‘i işbu râfi‘ü’l-vesîka el-Hâc Ahmed Ağa b. Ali nâm kimesne mahzarında ikrâr ve takrîr-i kelâm edip zevcim mezbûr el-Hâc Ahmed Ağa ile beynimizde hüsn-i zindegânemiz olmayıp ben hul‘a tâlibe olduğum ecilden zevcim mezbûr zimmetinde mütekarrir ve ma‘kūdün-aleyh beş yüz guruş mehr-i müeccelimden ve nafaka-i iddet-i ma‘lûmemden fâriğa olup ve meûnet-i süknâm dahi kendi üzerime olmak üzere zevcim mezbûr el-Hâc Ahmed Ağa ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve ibtidâ-i akdden târîh-i kitâba gelince beynimizde cereyân eden ahz u i‘tâ ve mu‘âmele-i şettâya ve gayra müte‘allıka vechen mine’l-vücûh ve sebeben mine’l-esbâb kat‘â da‘vâ ve husûmetim kalmayıp âmme-i de‘âvî ve kâffe-i mutâlebâtdan mezbûr el-Hâc Ahmed Ağa’nın zimmetini ibrâ-i âmm-ı katı‘u’n-nizâ‘la ibrâ ve iskāt eylediğimde mezbûr el-Hâc Ahmed Ağa dahi hukūk-ı zevciyete ve anası müteveffiye Âişe’nin terekesine ve ibtidâ-i akdden târîh-i kitâba gelince beynimizde cereyân eden ahz u i‘tâya ve gayra müte‘allıka vechen mine’l-vücûh ve sebeben mine’l-esbâb kat‘â alâka [ve] da‘vâ ve husûmetim kalmayıp âmme-i de‘âvî ve kâffe-i mutâlebâtdan benim zimmetimi ibrâ-i âmm-ı katı‘u’n-nizâ‘la ibrâ ve iskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Mustafa b. Halil ve Veli Bey b. Mehmed ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Mehmed Efendi b. Ahmed Efendi, diğer Mehmed Efendi b. Osman, Mustafa Efendi b. Abdullah, Mehmed Efendi b. el-Hâc İsmail, Süleyman Efendi b. Şeyh Ali, Şeyh Mehmed Efendi b. Mehmed, Ali Ağa b. Mustafa, Mustafa Çelebi b. Yakub, İbrahim Çelebi b. Ömer, Mustafa Ağa b. el-Hâc Osman, Salih Ağa b. el-Hâc Hasan, Ahmed Ağa b. Mahmud, el-Hâc Ahmed b. Mahmud, Mustafa Çelebi b. Halil, İsmail Ağa b. Davud, İbrahim Bey b. Abdullah.