Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 189 Hüküm no: 198 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe ile oğlu Osman Beşe’nin ortak oldukları evi Hacı Mustafa Ağa Para Vakfı’na sattıkları Medîne-i Üsküdar’da Mehmed Paşa mahallesi sâkinlerinden olup kendi tarafından asıl ve oğlu Osman Beşe tarafından ber-vech-i âtî vekîl olduğu Mehmed b. Ahmed ve Mustafa b. Ahmed nâm kimesneler şehâdetleriyle şer‘an sâbit olan Ahmed Beşe b. Muslu nâm kimesne meclis-i şer‘-i hatîrde ashâb-ı hayrâtdan işbu sâhibü’l-vesîka el-Hâc Mustafa Ağa b. Ali nâm kimesne mahzarında ikrâr ve takrîr-i kelâm edip mûmâ-ileyh el-Hâc Mustafa Ağa rızâen lillâhi te‘âlâ binâ eylediği sebîl ve mu‘allimhâne için kendi nukūd-ı mevkūfesine meşrûtiyyet üzere mütevellî ve nukūd-ı mevkūfe ile akār iştirâ eylemek üzere kıbel-i şer‘den me’zûn olduğuna binâen sekiz sehm i‘tibâriyla beş sehm irsen ve şirâen benim mülküm üç sehmi oğlum müvekkil-i mezbûrun mülkü olan mahalle-i mezbûrede vâki‘ etrâf-ı erba‘ası Kesedâr veresesi ve Taşçı Ali Ağa ve Dellâl Şa‘bân veresesi mülkleri ve tarîk-i âm ile mahdûd ve iki bâb fevkānî oda ve tahtında ahır ve kenîf ve bir mikdâr bahçeyi müştemil mülk menzil vakıf için mütevellî-i mezbûr el-Hâc Mustafa iki yüz yetmiş guruşa bey‘ <> ve teslîm eylediğimde ol dahi vakıf için iştirâ ve tesellüm ve kabûl etmekle semeni olan meblağ-ı merkūm iki yüz altmış guruşu mütevellî-i mûmâ-ileyh yedinden bi’t-tamâm ve’l-kemâl ahz u kabz ba‘de’l-yevm menzil-i mahdûd-ı mezkûrda benim [ve] müvekkil-i mezbûr [59b] Osman Beşe’nin kat‘â alâka ve medhali kalmayıp vakf-ı mezbûr akārâtından olmuşdur <> dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: İmâm Hüseyin Efendi b. Hasan, Kadı Mehmed Efendi b. Mehmed, el-Hâc İsmail b. Hasan, Süleyman Ağa b. Ahmed, el-Hâc Mehmed Ağa b. Ömer, Ali Çelebi b. Mustafa, Mustafa Çelebi b. Ali, Süleyman Çelebi b. Mehmed, Ali Çelebi b. Abdullah, Mehmed Efendi b. Mahmud, Hüseyin Bey b. Şa‘bân, el-Hâc Mehmed b. Abdülcelil, Müezzin Abdullah Halîfe b. el-Hâc Mehmed.