Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 190 Hüküm no: 199 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Abdurrahim Efendi’nin evini müştemilatıyla birlikte Ahmed Efendi’ye sattığı Medîne-i Üsküdar’da Selman Ağa mahallesi sâkinlerinden fahrü’l-kuzâti’l-kirâm Abdurrahim Efendi b. Abdülgani nâm kimesne meclis-i şer‘-i şerîf-i enverde işbu râfi‘ü’l-kitâb Ahmed Efendi b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i [mülkümde] münselik emlâkimden olup medîne-i mezbûr mahallâtından Mehmed Paşa mahallesinde vâki‘ bir tarafdan Osman Efendi veresesi mülkü ve bir tarafdan Hüseyin Efendi mülkü ve bir tarafdan Kuyumcu İsmail mülkü ve bir tarafdan tarîk-i âm ile mahdûd Lengerî? menzili demekle ma‘rûf hâriciyede bir bâb fevkānî oda ve bir sofa ve tahtında bir bâb oda ve bir ahır ve kenîf ve dâhiliyesinde iki bâb fevkānî oda ve bir sofa ve bir bâb tahtânî oda ve sofa ve bir matbah ve bir bi’r-i mâ ve kenîfi ve bir mikdâr bahçeyi müştemil bir bâb mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile beş yüz guruşa merkūm Ahmed Efendi’ye bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm beş yüz guruşu merkūm Ahmed Efendi yedinden bi’t-tamâm ve’l-kemâl ahz u kabz eyledim fîmâ-ba‘d menzil-i mahdûd-ı mezkûrda benim kat‘â alâka ve medhalim kalmayıp Ahmed Efendi’nin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Feyzullah Efendi b. Abdullah, Mehmed Efendi b. Feyzullah, el-Hâc Ömer Çelebi b. Yusuf, el-Hâc Hasan b. Ebubekir, Ahmed Çelebi b. Osman, Hâfız Ömer Efendi b. Mustafa, es-Seyyid Süleyman b. Mehmed.