Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 192 Hüküm no: 201 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Kıbtî Hamza’nın borçlarının ödemesi için varislerinin kendilerine intikal eden evi Kıbtî Mustafa’ya sattıkları Medîne-i Üsküdar’da Selami mahallesinde sâkin iken bundan akdem fevt olan Kıbtî tâifesinden Hamza b. Mustafa b. Hüseyin’in verâseti zevce-i menkûha-i metrûkesi Saliha bt. Mustafa ile vâlidesi Nazlı bt. Hasan’a ve sulbî sagīr oğlu Ahmed’e münhasıra ve tashîh meselesi yirmi dört sehmden i‘tibâr olunup sihâm-ı mezbûrdan üç sehmi zevcesi oğlu sagīr-i mezkûr Ahmed’e isâbeti tahakkukundan sonra mezbûretân Saliha ve Nazlı asâleten ve sagīr-i mezbûrun ammetesi Fâtıma bt. Mustafa nâm hatun bâ-hüccet-i şer‘iyye sagīr-i mezbûrun vasiyesi olmağla vesâyeten meclis-i şer‘-i şerîf-i enverde işbu râfi‘ü’l-vesîka Mustafa b. Mehmed nâm Kıbtî muvâcehesinde her biri bi’l-asâle ve bi’l-vesâye ikrâr ve takrîr-i kelâm edip mahalle-i mezbûrede vâki‘ etrâf-ı erba‘ası Yağcı İstifan ve el-Hâc Sefer oğlu mülkleri ve yine el-Hâc Sefer oğlu bahçesi ve tarîk-i âm ile mahdûd iki bâb fevkānî oda ve bir kiler ve bir mikdâr bahçeyi müştemil mülk menzil müteveffâ-yı mezbûrun ile’l-vefât mülkü olup ba‘de’l-vefât tashîh-i merkūm üzere her birimiz[e] isâbet ve intikāl etmişdir lâkin müteveffâ-yı mezbûrun şer‘an sâbit olan deynini edâ edecek menzil-i mezbûrdan gayrı mâlı olmayıp zarûret-i deyn için menzil-i mezbûrun bey‘i lâzım gelmekle ba‘de’l-müzâyede ve inkıtâ‘i’r-rağbe mezbûr Mustafa üzerinde yüz otuz guruşda karâr ve ziyâde tâlib-i âhar zuhûr etmeyip ve el-yevm semen-i merkūm menzil-i mezkûrun semen-i misli olduğu zeyl-i vesîkada muharrerü’l-esâmî [kimesneler] ihbârlarıyla zâhir ve nümâyân oldukdan sonra menzil-i mezkûru bey‘-i bâtt-ı sahîh-i şer‘î ile semen-i mezkûr yüz otuz guruşa bi’l-asâle ve bi’l-vesâye mezbûr Mustafa’ya bey‘ ü temlîk ve teslîm eylediğimizde ol dahi ber-vech-i muharrer iştirâ ve tesellüm ve kabûl eyledikden sonra semeni olan [meblağ-ı] merkūmu bi-kadri’l-hısâs bi’t-tamâm ve’l-kemâl ahz u kabz eyledik ba‘de’l-yevm menzil-i mezkûrda bizim ve sagīr-i mezbûrun kat‘â alâka ve medhali kalmayıp mezbûr Mustafa’nın mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Veli Bey b. Mehmed, Mustafa Ağa b. Ahmed, es-Seyyid Süleyman b. Mehmed, Hasan Bey b. Ramazan, Çukadâr Mustafa b. Mehmed, İsa Beşe b. Mehmed.