Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 193 Hüküm no: 202 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tora Hatun’un evinin yarısı ile üç ineğini oğlu Salih’e sattığı Yoros kazâsına tâbi‘ Kurddoğmuş nâm [karye] sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Turane bt. Ahmed nâm hatun medîne-i Üsküdar’da meclis-i şer‘-i şerîf-i enverde sulbî oğlu işbu râfi‘ü’l-vesîka Salih b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûrede vâki‘ bir tarafdan Mehmed Beşe veresesi mülkü ve bir tarafdan Nalband mülkü ve bir tarafdan harman yeri ve bir tarafdan tarîk-i âm ile mahdûd iki bâb fevkānî oda ve bir sofa ve bir mikdâr havlu ve kenîf ve bir mikdâr bahçeyi müştemil bir bâb mülk menzilimin nısf-ı şâyi‘i ile üç re’s kara sığır ineğimi tarafeynden îcâb ve kabûlü [hâvî] bey‘-i bâtt-ı sahîh-i şer‘î ile bi-safkatin vâhidetin [60a] on beş guruşa oğlum merkūm Salih’e bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı merkūm on beş guruş mutâlebesinden oğlum mezbûr Salih’in zimmetini ibrâ-i âmm-ı katı‘u’n-nizâ‘la ibrâ ve iskāt eyledim ba‘de’l-yevm zikri mürur eden menzil-i mahdûd-ı mezkûrun nısf-ı şâyi‘inde ve ineklerde benim kat‘â alâka ve medhalim kalmayıp oğlum mezbûrun mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Hüseyin Ağa b. Kânîzâde, el-Hâc Hanefi b. Ali, Hasan Bey b. Ramazan, es-Seyyid Süleyman b. Mehmed, İsa Beşe b. Musa, Mehmed Bey b. Ahmed, Mustafa Bey b. Ahmed.