Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 193 Hüküm no: 203 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un dükkân ve arsasını oğlu Mehmed Ağa’ya sattığı Husûs-ı âti’l-beyânın mahallinde ketb ü tahrîri için savb-ı şer‘-i enverden irsâl olunan Mevlânâ Ahmed Efendi b. Hüseyin medîne-i Üsküdar’da Hamza Fakıh mahallesinde sâkin fahrü’l-akrân es-Seyyid el-Hâc Mehmed Ağa’nın sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkine ve zâtı İsmail Ağa b. Davud [ve] Ali Ağa b. Mustafa nâm kimesneler ta‘rîfleriyle mu‘arrefe olan Ali Beşe [Ayşe] bt. Abdullah nâm hatun meclis-i ma‘kūd-ı mezkûrda işbu râfi‘ü’l-vesîka mûmâ-ileyh es-Seyyid el-Hâc Mehmed Ağa b. es-Seyyid el-Hâc Hüseyin Ağa mahzarında ikrâr ve takrîr-i kelâm edip silk-i mülkümde münselik emlâkimden olup medîne-i mezbûrda Atpazarıkapısı hâricinde vâki‘ bir tarafdan Pehlivanzâde veresesi tasarrufunda olan hârhânesi [kârhânesi] ve nalband dükkânı ve üç tarafdan tarîk-i âm ile mahdûd arsası merhûm Hayreddin Çavuş Mescid-i şerîfi vakfından olmağla arsasının senede vakf-ı mezbûra yüz seksen akçe mukāta‘a-i kadîmesi olan biri birine muttasıl altı kefnek [kepenk] bir bakkāl dükkânı ve bir canbaz ahırının binâsı mülküm olmağla ebniye-i mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ile oğlum mezbûr es-Seyyid el-Hâc Mehmed Ağa’ya bin beş yüz guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm mutâlebesinden oğlum mezbûrun zimmetini ibrâ ve iskāt eyledim zikr olunan ebniyenin arsasını dahi ma‘rifet-i mütevellî ile oğlum mezbûra meccânen ferâğ ve tefvîz eylediğimde ol dahi tefevvüz ve kabûl etmekle ebniye-i mezkûre mülk-i müşterâsı ve arsa-i merkūme hakk-ı müfevvezi olup benim kat‘â alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Mustafa ve muhzırbaşı ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Süleyman Efendi b. Ali, İsmail Ağa b. Davud, Ali Ağa b. Mustafa, Mustafa Ağa b. el-Hâc Osman, İbrahim Bey b. Abdullah, es-Seyyid Mustafa b. es-Seyyid Mehmed.