Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 194 Hüküm no: 204 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Beşe’nin kaybolan beygirinin Mustafa Beşe’de olduğunu ispat ettiği Fi’l-asl vilâyet-i Anadolu’da medîne-i Tarsus kazâsına tâbi‘ Torluoğlu karyesi ahâlîsinden olup sefer-i hümâyûn-ı nusret-makrûna memûr olmağla ol vechile medîne-i Üsküdar’da müsâferet vechi üzere sâkin işbu râfi‘ü’l-vesîka Abdurrahman Beşe b. Mehmed nâm kimesne meclis-i şer‘-i hatîrde zikri âtî çil yağız bargire vaz‘-ı yedi mütehakkık olan Mustafa Beşe b. Ömer nâm kimesne mahzarında üzerine da‘vâ ve takrîr-i kelâm edip işbu meclis-i şer‘de mu‘âyene ve müşâhede olunan çil yağız bargir benim yedimde mülküm olup târîh-i kitâbdan bir buçuk sene mukaddem sâlifü’z-zikr Torluoğlu karyesi hâricinde mülkümden zâyi‘ olup mezbûr Mustafa Beşe yedinde bulmakla bi’l-istihkāk taleb ederim suâl olunsun dedikde gıbbe’s-suâl mezbûr Mustafa Beşe cevâbında zikr olunan bargiri Salkı kasabası sükkânından el-Hâc Süleyman b. Abdülmennan nâm kimesneden yirmi beş guruş semen-i medfû‘a iştirâ edip mülk-i müşterâm olmak üzere vaz‘-ı yed ederim müdde‘î-i mezbûrun ber-vech-i muharrer mülkü olduğu hâlde mülkünden zâyi‘ eylediğini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden sâlifü’z-zikr Torluoğlu karyesi ahâlîsinden sefer-i hümâyûna memûr olup medîne-i mezbûrede müsâfiren sâkin Mustafa Beşe b. Ali ve Hasan Beşe b. Bektaş nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu meclis-i şer‘de mevcûd olan çil yağız bargir işbu müdde‘î-i mezbûr Abdurrahman Beşe’nin yedinde mülkü olduğu hâlde târîh-i kitâbdan bir buçuk sene mukaddem zikr olunan Torluoğlu karyesi hâricinde mülkünden zâyi‘ eyledi biz bu husûsa bu vech üzere şâhidleriz şehâdet ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’-kabûl şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fî 27 Safer sene 1151 Şuhûdü’l-hâl: Veli Beşe b. Hüseyin, Bayrakdâr Ali Beşe b. İbrahim, Mustafa Beşe b. Ali, Hasan Beşe b. Bektaş, Mehmed Beşe b. Halil.