Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 199 Hüküm no: 210 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm ile Mustafa’nın Silahdar-ı Şehriyari Halil Ağa Vakfı’ndan borç aldıkları Medîne-i Üsküdar’da Hacce Hatun mahallesinde vâki‘ zikri âtî menzil yirmi dört sehm i‘tibâriyla on yedi sehmi Şerife Ümmügülsüm bt. Anber Mehmed Ağa’nın ve yedi sehmi es-Seyyid Mustafa Beşe b. el-Hâc Mehmed nâm kimesnenin mülkleri olduğu lede’ş-şer‘i’l-enver mütehakkık olmağla zâtı el-Hâc Ali b. Hasan ve Molla Ali b. Abdullah nâm kimesneler ta‘rîfleriyle mu‘arrefe olan mezbûre Şerife Ümmügülsüm nâm hatun ile es-Seyyid Mustafa nâm kimesne meclis-i şer‘-i şerîf-i enverde Silahdâr-ı şehriyârî Halil Ağa nâm sâhibü’l-hayr[ın] vilâyet-i Rumeli’de Peremedi kazâsına tâbi‘ Keşovis? nâm karyede binâ ve vakfeylediği mu‘allimhâne için nukūd-ı mevkūfesi ile akār iştirâ eylemek üzere bi’l-fi‘il mütevellîsi olan işbu râfi‘ü’l-kitâb el-Hâc Ali Ağa b. Mustafa nâm kimesne mahzarında her biri ikrâr ve takrîr-i kelâm edip akd-i âti’z-zikrin sudûruna değin silk-i mülkümüzde münselik ber-vech-i muharrer emlâkimizden olup mahalle-i mezbûrede vâki‘ bir tarafdan Halil Beşe mülkü ve bir tarafdan Mehter Yusuf Ağa veresesi mülkü ve bir tarafdan Ömer Ağa mülkü ve bir tarafdan tarîk-i âm ile mahdûd hâriciyesinde bir bâb tahtânî oda ve kenîf ve dâhiliyesinde üç bâb oda ve bir sofa ve bir tahtânî matbah ve bi’r-i mâ ve kenîf ve bir mikdâr bahçe ve sokak kapısını müştemil mülk olup be-hesâbı terbî‘î üç yüz seksen sekiz zirâ‘ arsalı mülk menzilimi[zi] tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz guruşa vakıf için mütevellî-i merkūma bey‘ ü teslîm eylediğimizde ol dahi ber-vech-i muharrer mâl-ı vakf ile vakıf için iştirâ ve tesellüm ve kabûl eyledikden sonra semeni olan meblağ-ı merkūmu mütevellî-i merkūm el-Hâc Ali Ağa yedinden bi-kadri’l-hısâs tamâmen ahz u kabz eyledik ba‘de’l-yevm menzil-i mezkûr vakf-ı mezbûr müsakkafâtından olup bizim alâka ve medhalim[iz] kalmamışdır dediklerinde gıbbe’t-tasdîkı’ş-şer‘î mütevellî-i merkūm meclis-i mezkûrda mezbûre Şerife Ümmügülsüm muvâcehesinde ikrâr-ı tâm edip menzil-i merkūmu iki yüz on guruş icâre-i mu‘accele ve yevmî bir akçe icâre-i müeccele-i misli ile mezbûre Şerife Ümmügülsüm’e îcâr ve teslîm eylediğimde ol dahi ber-vech-i muharrer istîcâr ve tesellüm ve kabûl etmekle zikr olunan menzilin istîfâ da‘vâsına müte‘allıka âmme-i de‘âvî ve mutâlebâtdan gerek mütevellî-i mezbûru ve gerek taraf-ı vakfı ibrâ ve iskāt eyledi dedikde gıbbe’t-tasdîkı’ş-şer‘î [mâ hüve’l-vâki‘ bi’t-taleb ketb olundu] Fi’l-yevmi’s-sânî min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Ali b. Hasan, Molla Ali b. Abdullah, Ahmed Bey b. Ali, Abdullah Efendi b. Halil, Veli Beşe b. Mustafa, es-Seyyid Mehmed Çelebi b. İsmail.