Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 200 Hüküm no: 211 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin Arakıyeci Mehmed Mescidi Vakfı’ndan kiraladığı arsa üzerine dükkân inşa etmesinde bir mahzur olmadığı Medîne-i Üsküdar’da Arakıyeci Mehmed mahallesi sâkinlerinden işbu râfi‘ü’l-vesîka Mehmed Beşe b. Mustafa nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip mahalle-i mezbûre mescid-i şerîfi kurbünde vâki‘ bir tarafdan mescid-i şerîfin su kuyusu ve bir tarafdan mescidin kenîf yolu ve bir tarafdan imâma meşrûta menzil ve bir tarafdan tarîk-i âm ile mahdûd tûlen ve arzen yirmi üç zirâ‘ arsa-i hâliyeyi mescid-i şerîf mütevellîsi yevmî bir akçe icâre-i müeccele ile bana îcâr ve teslîm ettikde ben dahi istîcâr ve kabûl edip arsa-i mezkûre hâlâ zabt u tasarrufumda olmağla arsa-i mezkûre üzerine bir bâb dükkân binâ eylemek murâd eylediğim mahall-i merkūmda edeceğim dükkânın kimesneye zarârı var mıdır ahâlî-i mahalleden suâl olunmak matlûbumdur dedikde hâzırûn bi’l-meclis olup zeyl-i vesîkada muharrerü’l-esâmî Müslimîn meclis-i mezkûrda arsa-i mezkûre üzerine mezbûr Mehmed Beşe’nin [binâ] edecek dükkânın kimesneye zarârı olmayıp vakf-ı şerîfe her vechile enfa‘ olduğunu her biri alâ-tarîkı’ş-şehâde haber vermeleriyle mezbûr Mehmed Beşe’ye kıbel-i şer‘den ber-vech-i muharrer izin verilmeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: İmâm Mesud Efendi b. Mehmed, Müezzin Ali Efendi b. Ahmed, Hoca Ali Efendi b. Yusuf, Şeyh Süleyman Efendi b. Hasan, Molla Ahmed b. Hasan, Mehmed Odabaşı b. Halil, Mehmed Bey b. Abdullah, es-Seyyid Süleyman b. Mehmed.