Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 200 Hüküm no: 212 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mehmed Bey’in evini müştemilatıyla birlikte Hasan Beşe ile hanımı Zeyneb’e sattığı Mahmiye-i İstanbul’da Ayvansaray sâkinlerinden Bostânî Mehmed Bey b. Abdullah nâm kimesne medîne-i Üsküdar’da meclis-i şer‘-i şerîf-i enverde işbu râfi‘iyyü’l-vesîka Hasan Beşe b. Abdullah ve zevcesi Zeyneb bt. Abdullah nâm zevcân mahzarlarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup medîne-i mezbûreye tâbi‘ Çengar (Çengel) karyesinde vâki‘ bir tarafdan Şeker Mustafa Efendi mülkü ve bir tarafdan el-Hâc Abdullah mülkü ve bir tarafdan bahçe ve bir tarafdan tarîk-i âm ile mahdûd üç bâb fevkānî oda ve bir matbah ve kenîf ve bir mikdâr havlu ve bir mikdâr bahçeyi müştemil bir bâb mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa zevcân-ı mezbûrâna ale’l-iştirâki’s-seviyy bey‘ ü temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruşu zevcân-ı mezbûrân yedlerinde[n] bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mahdûd-ı mezkûrda benim kat‘â alâka ve medhalim kalmayıp zevcân-ı mezbûrân Hasan Beşe ve Zeyneb’in mülk-i müşterâları ve hakk-ı sırfları olmuşdur keyfe mâ yeşâ’ân ve yahtârân mutasarrıf olsunlar dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Fahrü’l-kuzâti’l-kirâm es-Seyyid İsmail Efendi b. Mehmed, Mehmed Efendi b. Ahmed, Mustafa Çelebi b. Hüseyin, Veli Ağa b. Mehmed, Berber Mehmed Çelebi b. Ahmed, el-Hâc Hanefi b. Ali, Hasan Bey b. Ramazan.