Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 201 Hüküm no: 213 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un kendisini boşayan eşi Mustafa’ya açtığı nafaka-i iddet davasında haklı bulunduğu Medîne-i Üsküdar’da Tenbel el-Hâc Mehmed mahallesi sâkinelerinden olup zâtı Mustafa Çelebi b. Ahmed ve es-Seyyid Ahmed b. Mehmed nâm kimesneler ta‘rîfleriyle mu‘arrefe olan işbu râfi‘atü’l-vesîka Emine bt. Hüseyin nâm hatun meclis-i şer‘-i şerîf-i enverde es-Seyyid Süleyman Çelebi b. Mehmed nâm kimesne mahzarında da‘vâ ve takrîr-i kelâm edip gāib ani’l-meclis Mustafa b. Ali b. Abdülmennan nâm kimesne zevcim olup târîh-i kitâbdan sekiz ay mukaddem diyâr-ı âhara gider oldukda öyle şart eyledi ki eğer ben altı ay tamâmına değin sana gelip dâhil olmazsam benden talâk-ı bâyin ile mutallaka ol deyip bu şart üzerine diyâr-ı âhara gidip altı ay mürûr edip gelip bana dâhil olmamak ile mezbûr Mustafa’dan ben bâyinen mutallaka olmağın ve mezbûr es-Seyyid Süleyman Çelebi’yi iktizâ eden her umûruna vekâlet-i mutlaka ile vekîl edip ol dahi ber-vech-i muharrer vekâlet-i mezbûreyi kabûl etmekle mezbûr es-Seyyid Süleyman Çelebi’nin vekâletine binâen nafaka-i iddet-i ma‘lûmemi ondan taleb ederim suâl olunup alıveri[l]mesi matlûbumdur dedikde gıbbe’s-suâl mezbûr es-Seyyid Süleyman Çelebi cevâbında vekâlet-i mutlaka [ile] vekîl olduğunu ikrâr lâkin altı ay tamâmına değin gelip dâhil olmaz ise talâk-ı bâyin ile mutallaka olsun deyü şart edip ve altı ay mürûr eylediğini inkâr edicek müdde‘iyye-i mezbûreden müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden mahalle-i mezbûre sâkinlerinden Ebubekir b. el-Hâc Hüseyin ve Ali Çelebi b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûre Emine’nin zevci gāib ani’l-meclis mezbûr Mustafa b. Ali b. Abdülmennan târîh-i kitâbdan sekiz ay mukaddem diyâr-ı âhara gider oldukda altı ay tamâmına değin mutallaka olsun deyü şart ve ta‘lîk edip altı ay mukaddem [tamâm] olup gelip dâhil olmamağla şart-ı mezkûra binâen mezbûre Emine zevc-i gāib-i mezbûrdan mutallaka olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri [61b] makbûle olmağın mûcebince ba‘de’l-hükm nafaka-i iddet-i ma‘lûmesini mezbûre Emine Hatun’a edâya mezbûr es-Seyyid Süleyman Çelebi’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Mustafa Bey b. Ahmed, es-Seyyid Süleyman b. Ali, Ebubekir b. el-Hâc Hüseyin, Ali Çelebi b. Hüseyin, Hasan Bey b. Ramazan, el-Hâc Hanefi b. Ali, İsa Beşe b. Musa.