Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 202 Hüküm no: 214 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Hatun’un kızı Ayşe ile ortak olduğu ev hissesini kızına sattığı Medîne-i Üsküdar’da Evliyâ Hoca mahallesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Sultane bt. Sefer nâm hatun meclis-i şer‘-i şerîf-i enverde işbu râfi‘atü’l-vesîka kebîre kızı Âişe bt. İbrahim nâm hatun mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ bir tarafdan Ali Beşe mülkü ve bir tarafdan Râbia Hatun mülkü ve bir tarafdan Sarı Hammâmî vereseleri mülkleri ve bir tarafdan tarîk-i hâs ile mahdûd iki bâb tahtânî oda ve iki sofa ve bir bi’r-i mâ ve kenîf ve bir mikdâr bahçeyi müştemil bir bâb mülk menzilin nısf-ı şâyi‘i kızım mezbûre Âişe’nin mülk-i müşterâsı olup ve nısf-ı şâyi‘ası benim mülküm olmağla ben nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile elli guruşa kızım mezbûre Âişe’ye bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm elli guruşu kızım mezbûre Âişe’nin yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mahdûd-ı mezkûrun nısf hisse-i şâyi‘amda [şâyi‘asında] benim kat‘â alâka ve medhalim kalmayıp mecmû‘-ı menzil-i mahdûd-ı mezkûr kızım mezbûre Âişe’nin mülk-i müşterâsı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Mahmud Çelebi b. Abdurrahman, İmâm Halil Efendi b. Veli, Süleyman b. Abdullah, Mustafa Çelebi b. Ruhani?, Eskici Ahmed Çelebi b. ( ), Berber Mustafa b. ( ), İsmail b. Abdullah.