Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 203 Hüküm no: 215 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un ev hissesi ile bazı eşyalarını eşi Süleyman’a satıp mehir bedelini hibe ettiği Medîne-i Üsküdar’da Vâlide-i Atîk mahallesi sâkinelerinden olup zâtı Veli Ağa b. Mehmed ve Mustafa Çelebi b. Ahmed nâm kimesneler ta‘rîfleriyle mu‘arrefe olan Fâtıma bt. Abdullah nâm hatun meclis-i şer‘-i şerîf-i enverde işbu râfi‘ü’l-vesîka hâlâ zevci es-Seyyid Süleyman Çelebi b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ bir tarafdan Salih Çelebi menzili ve bir tarafdan Hüseyin menzili ve bir tarafdan Göncü Mehmed menzili ve bir tarafdan tarîk-i âm ile mahdûd iki bâb fevkānî oda ve bir bâb tahtânî oda ve bir ahır ve iki sofa ve kenîf ve bir mikdâr bahçeyi müştemil bir bâb mülk menzilin nısf-ı şâyi‘i zevcim mezbûr Süleyman Çelebi’nin olup ve nısf-ı şâyi‘i benim olmağla ben nısf hisse-i şâyi‘am ile emlâkimden dokuz yemenî yastık ve iki minder ve bir döşek ve üç yorgan ve iki tencere ve dört sahan ve bir tâbe ve bir leğen ibrik ve bir sini ve bir sîm kuşak ve bir altın küpe ve bir göcen kürkü ve bir kedi kürkü ve bir zümrüdî ferâcemi tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim mezbûr Süleyman Çelebi’ye bi-safkatin vâhidetin yüz guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruş mutâlebesinden zevcim mezbûr Süleyman Çelebi’nin zimmetini ibrâ ve iskāt eyledim ba‘de’l-yevm menzil-i mahdûd-ı mezkûrda olan nısf hisse-i şâyi‘amda ve eşyâ-i muharrere-i mezkûrede benim kat‘â alâka ve medhalim kalmayıp zevcim mezbûr Süleyman Çelebi’nin mülk-i müşterâsı ve hakk-ı sırfı olup ve mezbûrun zimmetinde mütekarrir ve ma‘kūdün-aleyh olan bin akçe mehr-i müeccelimi dahi zevcim mezbûr Süleyman Çelebi’ye hîbe-i sahîha-i şer‘iyye ile hîbe eyledim fîmâ-ba‘d zikri mürûr eden menzil-i mezkûr ile ve eşyâ-i mezkûrede ve zikri mürûr eden bin akçe mehr-i müeccelimde benim kat‘â alâka ve medhalim kalmadı zevcim mezbûr Süleyman Çelebi’nin mülk-i müşterâsı ve hakk-ı mevhûbu olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 Rebî‘ülevvel sene 1151 Şuhûdü’l-hâl: İsmail Çelebi b. Receb, Mehmed Efendi b. Ahmed, İbrahim Ağa b. Ömer, Subaşı Ali Ağa b. Şa‘bân, Mustafa Çelebi b. Ahmed, el-Hâc Hanefi b. Ali, Veli Ağa b. Mehmed, Hasan Bey b. Ramazan, Nalband el-Hâc Kerim b. ( ), İsmail Çelebi b. İbrahim, Çukadâr Mustafa b. ( ), Çukadâr Hüseyin Çelebi, Mukayyid Hâfız Ömer Efendi b. ( ).