Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 204 Hüküm no: 217 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zincirlikuyu Vakfı âbkeşliğine Hasan’ın görevlendirildiği Medîne-i Üsküdar’da Zincirlikuyu kurbünde vâki‘ bi’r-i mezbûrdan su çekip musluğa vaz‘ eylemek üzere yevmî bir akçe vazîfe ile âbkeş olan Hasan b. Ali nâm kimesne müddet-i medîdeden beri terk-i hizmet edip musluğa su vaz‘ olunmamağla hizmet-i merkūme uhdesinden gelmeğe kādir idiği ahâlî-i sûkdan zeyl-i vesîkada muharrerü’l-esâmî cemm-i gafîr icmâ‘ ve ittifâkları ile işbu râfi‘ü’l-vesîka Hasan b. Ömer nâm kimesne kıbel-i şer‘den âbkeş ta‘yîn olundukda ol dahi ber-vech-i muharrer kabûl ve hizmet-i merkūmeyi edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Osman b. Mehmed, el-Hâc İbrahim b. Mehmed, es-Seyyid İbrahim b. Halil, Salih Çelebi b. Ahmed, Ahmed Efendi b. Süleyman, es-Seyyid Ömer Çelebi b. es-Seyyid Mehmed, İsmail b. Receb.