Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 204 Hüküm no: 218 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop’un küçük oğlu Haçador’a sarkıntılık etmek kastıyla dövüp yaraladığı iddiasıyla Avanes’e açtığı davada sulh olduğu Medîne-i Üsküdar’da Yenimahalle sâkinlerinden Abraham v. Marat nâm zimmî kendi tarafından asâleten ve zevcesi Ulufer bt. Kirkor nâm Nasrâniye tarafından vekîl-i müsecceli olup vekâleten meclis-i şer‘-i şerîf-i enverde işbu râfi‘ü’s-sifr Avanes v. Agop nâm zimmînin babası ve tarafından ber-vech-i âtî tasdîka vekîli olan mezbûr Agop zimmî muvâcehesinde bi’l-asâle ikrâr ve takrîr-i kelâm edip târîh-i kitâbdan bir gün mukaddem mesfûr Avanes zimmî mahalle-i mezbûrede sâkin olduğu menzili derûnunda sagīr oğlum Haçador nâm sagīri fi‘l-i şenî kasdıyla ahz ve darb ve kara bere eyledi deyü bundan akdem da‘vâ sadedinde olmuşidim el-hâletü hâzihi beynimize muslihûn tavassut edip beni da‘vâ-yı mezkûremden an-inkârin on iki guruş bedel-i sulh üzerine inşâ-i akd-i sulh eylediklerinde ben dahi sulh-ı merkūmu kabûl ve bedel-i sulh olan meblağ-ı merkūm on iki guruşu müvekkil-i mesfûr Avanes yedinden tamâmen ahz u kabz eyledim ba‘de’l-yevm husûs-ı mezkûra müte‘allıka âmme-i de‘âvî ve kâffe-i mutâlebâtdan müvekkil-i mesfûr Avanes zimmî ile babası vekîli mesfûr Agop zimmînin zimmetlerini ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Mihrimah Câmi‘-i şerîfi hatîbi el-Hâc Mahmud Efendi, Veli Ağa b. Mehmed, Osman Ağa b. Hasan, Mehmed Efendi b. Ahmed, es-Seyyid Süleyman b. Mehmed, Hasan Bey b. Ramazan, el-Hâc Hanefi b. Ali, İsa Beşe b. Musa. Simon v. Kirkor, Avanes v. Bağdasar, Panos v. Kurir?