Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 205 Hüküm no: 219 Orijinal metin no: [62a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çemişgezekli Serkiz’in evini Markor ve Mosi’ye sattığı Fi’l-asl vilâyet-i Anadolu’da medîne-i Diyarbekir sancağında vâki‘ Çemişgezek kazâsına tâbi‘ Oskik nâm karye sâkinlerinden olup medîne-i Üsküdar’da müsâferet vechi üzere sâkin Serkiz v. Kazer nâm zimmî meclis-i şer‘-i şerîf-i enverde işbu râfi‘ü’s-sifr Markor v. Avanes ve Mosi v. Markar nâm zimmîler muvâcehelerinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûrede vâki‘ bir tarafdan Avanes zimmî mülkü ve bir tarafdan Karo zimmî mülkü ve bir tarafdan müşteri-yi mezbûr zimmî mülkü ve bir tarafdan tarîk-i âm ile mahdûd bir bâb tahtânî oda ve bir mikdâr havlu ve bir harman yeri ve bir mikdâr bahçeyi müştemil bir bâb mülk menzilimin üç hisse i‘tibâriyla iki hissesini mesfûr Markor’a ve bir hissesini mesfûr Mosi’ye ale’l-iştirâk tarafeynden îcâb ve kabûlü hâvî bey‘-i bâtt-ı sahîh-i şer‘î ile kırk guruş ile bir tüfengi mesfûrân Markor’a ve Mosi’ye bey‘ ü temlîk ve mahallinde kabza taslît eylediğimde onlar dahi ber-vech-i muharrer iştirâ ve temellük ve kabûl eylediklerinden sonra semeni olan meblağ-ı merkūm kırk guruş ile tüfengi yedlerinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mahdûd-ı mezkûrda benim kat‘â alâka ve medhalim kalmayıp mesfûrân Markor ve Mosi nâm zimmîlerin mülk-i müşterâsı ve hakk-ı sırfları olmuşdur keyfe mâ yeşâ’ân ve yahtârân mutasarrıf olsunlar dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Veli Ağa b. Mehmed, es-Seyyid Süleyman b. Mehmed, Hasan Bey b. Ramazan. …? Abraham v. Arakil, Parsakoğlu Sinan, Boyacıoğlu, Kozezoğlu Abraham, Mardıros, İskeleli? Zavenoğlu.