Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 206 Hüküm no: 220 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin’in evini müştemilatıyla birlikte Bogos ve Anna’ya sattığı Mahmiye-i İstanbul’da Ayasofya-i Kebîr mahallesinde sâkin Artin v. Parpozad v. Artin nâm zimmî tarafından ber-vech-i âtî ikrâra vekîl olduğu Asvador v. Minas ve Serkiz v. Margos nâm zimmîler şehâdetleriyle şer‘an sâbit olan Bağdasar v. Bogos nâm zimmî meclis-i şer‘-i şerîf-i enverde işbu râfi‘ü’s-sifr Bogos v. Serkiz ve Anna bt. Kivork nâm Nasrâniye muvâcehelerinde bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim mezbûrun silk-i mülkünde münselik emlâkinden olup medîne-i Üsküdar’da Yenimahalle’de vâki‘ bir tarafdan Nerses mülkü ve bir tarafdan Çatal bahçesi ve bir tarafdan ba‘zan Vartires mülkü ve bir tarafdan tarîk-i âm ile mahdûd iki bâb fevkānî oda ve bir sofa ve bir tahta-pûş ve bi’r-i mâ ve kenîf ve bir mikdâr bahçeyi müştemil bir bâb mülk menzilini tarafeynden îcâb ve kabûlü hâvî bey‘-i bâtt-ı sahîh-i şer‘î ile beş yüz doksan guruşa mesfûrâna ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı merkūm beş yüz doksan guruşu mesfûrân Bogos ve Anna yedlerinden bi’t-tamâm ve’l-kemâl ahz u kabz eyledi ba‘de’l-yevm zikri mürûr eden menzil-i mahdûd-ı mezkûrda müvekkilim mesfûr Artin zimmînin kat‘â alâka ve medhali kalmayıp mesfûrân Bogos ve Anna’nın mülk-i müşterâları ve hakk-ı sırfları olmuşdur keyfe mâ yeşâ’ân ve yahtârân mutasarrıf olsunlar dedi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. [62b] Şuhûdü’l-hâl: Veli Ağa b. Mehmed, Mustafa Çelebi b. Ahmed, es-Seyyid Süleyman b. Mehmed, Hasan Bey b. Ramazan. Azarya v. Zohaçador? ve Papa v. Mardıros, Ambra v. Zahrab, Panos v. Kurir?