Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 331 Hüküm no: 329 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskender Paşa Camii imamı Mustafa Efendi b. Ali’nin imama meşrûta evin süknâlığı için açtığı davada haksız olduğu Mahmiye-i İstanbul’da Yeniodalar kurbünde vâki‘ İskender Paşa Câmi‘-i şerîfi imâmı Mustafa Efendi b. Ali nâm kimesne meclis-i şer‘-i hatîr-i lâzımü’t-tevkīrde bâ‘isetü hâzihi’l-vesîka Hadice Hatun bt. İshak b. Ahmed tarafından ber-vech-i âtî husûmet ve redd-i cevâba vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mehmed Çelebi b. Ali ve Ali b. Mehmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Mustafa Çelebi b. Ali mahzarında üzerine da‘vâ ve takrîr-i kelâm edip İskender Bey nâm sâhibü’l-hayr binâ ve vakıf ve süknâsını mahalle-i mezbûrede imâm olanlara şart eylediği mahalle-i mezbûrede vâki‘ bir tarafdan Tarakçı Hasan Efendi odaları ve bir tarafdan Hüseyin Odabaşı menzili ve bir tarafdan Uzun Ali menzili ve bir tarafdan tarîk-i âm ile mahdûd ve ma‘lûmü’l-müştemilât bir bâb vakıf menzili müvekkile-i mezbûre Hadice Hatun hilâf-ı şart-ı vâkıf fuzûlî zabt ve tasarruf eder suâl olunup müvekkile-i mezbûrenin menzil-i mezbûrdan kasr-ı yedine vekîl-i merkūma tenbîh olunmak murâdımdır dedikde gıbbe’s-suâl vekîl-i merkūm cevâbında mârru’z-zikr menzil vâkıf-ı mezbûrun vakfı olduğunu ikrâr lâkin menzil-i mezbûrun gallesi câmi‘-i mezbûrda imâm olanlara meşrût olmağla işbu yedimizde olan hüccet-i müte‘addide mantûkları üzere bundan akdem câmi‘-i mezkûrun imâmı olan Resul Efendi nâm kimesne menzil-i mezbûr harâb olup taraf-ı vakıfdan dahi ta‘mîre müsâ‘ade olmamağla beher sene dörder yüz akçe mukāta‘a ile mülkiyeten binâ etmek üzere mütevellî-i vakfdan me’zûnen bin seksen târihinde istîcâr ve mâlıyla mülkü olunmak üzere binâ ve vakfiyesinde keşif hüccetleri mantûkunca elli altı bin altı yüz on akçe sarf eyledikden sonra mezbûr Resul Efendi bin yüz on altı târihinde vefât eylediğinde vârisi zevcesi Âişe bt. Hasan nâm hatun ile sulbiye kebîre kızları Emine ve Hadice nâm hatunlara münhasıra olmağla ebniye-i mezkûre mezbûrelere ba‘de’l-intikāl mezbûreler dahi ebniye-i mezbûreyi bin yüz on yedi senesinde [73b] el-Hâc Ahmed b. İbrahim nâm kimesneye semen-i ma‘lûma bey‘ ve arsasını dahi izn-i mütevellî ile fâriğler olduklarından sonra mezbûr el-Hâc Ahmed dahi bin yüz otuz senesinde vefât eylediğinde yine menzil-i mezbûr sulbî oğlu olup bunda akdem câmi‘-i mezkûrda imâm olan Mehmed Efendi nâm kimesneye bi’l-irsi’ş-şer‘î ba‘de’l-intikāl mezbûr Mehmed Efendi dahi vefât eylediğinde verâseti zevcesi Zeyneb bt. Ali nâm hatun ile zî-rahm cihetinden müvekkilem mezbûre Hadice Hatun’a ba‘de’l-intikāl mezbûretân Zeyneb ve Hadice dahi tereke-i mezbûreyi beynlerinde iktisâm eylediklerinde menzil-i mezkûr işbu yedimde olan hüccet-i şer‘iyye mûcebince müvekkilem mezbûre Hadice’nin hisse-i şer‘iyyesi’çün ifrâz ve ta‘yîn olunmuş idi ve târih-i mezbûrdan bu ana gelince mukāta‘a-i mezkûre senevî dörder yüz akçeyi câmi‘-i mezkûrda imâm olanlar kabz edegelmişlerdir deyü ber-vech-i muharrer süknâ şartını inkâr ve mazmûnları min-külli’l-vücûh takrîrine mutâbık hüccet-i şer‘iyyeler ibrâz eylediğinden gayrı yedinde olan müte‘addid fetvâ-yı şerîfeler mefhûm-ı münîfleri üzere mahz-ı şart vakıfda tesâmu‘la şehâdet makbûle olmayıp ve mezbûrların beyânı mülkiyete <> tasarrufları altmış üç seneye bâliğ ve hâl vech-i meşrûh üzere olup müddet-i mezbûreden berü menzil-i mezbûrun binâsının mülkiyetine tasarruf olduğunu ahâlî-i mahalle-i mezbûreden ve müsin ve ihtiyârlardan Abdülbâki Bey b. Sefer Paşa ve el-Hâc Hüseyin Efendi b. Mehmed ve el-Hâc Selim b. Abdullah ve Hüseyin Çelebi b. İlyas ve es-Seyyid Mahmud Efendi [b.] Mehmed ve el-Hâc İbrahim b. Receb ve el-Hâc Mustafa b. Hüseyin ve Mustafa b. Ali nâm kimesneler dahi haber verip ve imâm-ı mezbûr Mustafa Efendi’nin süknâ şartı da‘vâsı ber-vech-i meşrûh olmamağla menzil-i mezkûrun ber-vech-i meşrûh mukāta‘a-i mezkûresini ba‘de’l-kabz süknâsına ta‘arruz etmemek üzere mezbûr İmâm Mustafa Efendi’ye tenbîh-birle mâ-vaka‘a bi’t-taleb ketb olundu. Bâ-imzâ-i hazret-i efendi. Fi’l-yevmi’l-aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Salih Çelebi b. Süleyman, diğer Mehmed Çelebi b. Abdullah, Du‘âcı İbrahim Çelebi b. Mustafa, Abdullah Çelebi b. Mustafa, Abdullah Çelebi b. Mustafa, Mustafa Bey b. Mehmed, Mehmed Ağa b. Mehmed.