Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 210 Hüküm no: 226 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs Hatun’un eşi Mustafa’dan muhâlaa yoluyla boşandığı Medîne-i Üsküdar’da Mehmed Paşa mahallesi sâkinelerinden olup zâtı vech-i şer‘î üzere mu‘arrefe olan Belkıs bt. Abdullah nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-vesîka Mustafa b. Mustafa nâm kimesne mahzarında bast-ı kelâm ve ifâde-i merâm edip mezbûr Mustafa zevcim olup beynimizde hüsn-i mu‘âşeretimiz olmamağla ben hul‘a tâlibe olduğum ecilden mezbûrun zimmetinde mütekarrir ve ma‘kūdün-aleyh olan altı yüz akçe mehr-i müeccelimden ve nafaka-i iddet-i ma‘lûmemden fâriğa olup [ve me’ûnet-i] süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebât ve eymân [ve] muhâsamâtdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve iskāt eyledik gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Hasan Bey b. Ramazan, Mustafa Çelebi b. Ahmed, Osman Çelebi b. Halil, Seyyid Süleyman b. Mehmed.