Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 215 Hüküm no: 234 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer’in bağını Süleyman Çelebi’ye sattığı Husûs-ı âti’l-beyânın mahallinde ketb ü tahrîri için savb-ı şer‘-i enverden irsâl olunan Mevlânâ Ahmed Efendi b. Hüseyin medîne-i Üsküdar’a tâbi‘ İstavros karyesine varıp zeyl-i vesîkada muharrerü’l-esâmî [Müslimîn] huzûrlarında akd-i meclis-i şer‘ ettikde karye-i Kısıklı sâkinlerinden Ömer b. Osman nâm kimesne meclis-i ma‘kūd-ı mezkûrda işbu râfi‘ü’l-vesîka Süleyman Çelebi [b.] el-Hâc Hasan mahzarında ikrâr ve takrîr-i kelâm edip silk-i mülkümde münselik emlâkimden olup İstavros karyesi hâricinde merhûm Abdullah Ağa toprağında vâki‘ bir tarafdan Mehmed Beşe ve bir tarafdan benim ve bir tarafdan mezbûr Süleyman Çelebi bağları ve bir tarafdan tarîk-i âm ile mahdûd tahmînen iki dönüm bir kıt‘a harâb bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile on dört guruşa mezbûr Süleyman Çelebi’ye bey‘ ü teslîm ve temlîk eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūmu bi’t-tamâm ve’l-kemâl ahz u kabz eyledim ba‘de’l-yevm bağ-ı mezkûrda benim kat‘â alâka ve medhalim kalmayıp mezbûr Süleyman Çelebi’nin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Mustafa ve Muhzır Osman ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Mehmed Beşe b. Abdullah, Müezzin İsmail Çelebi b. Ali, Osman Efendi b. el-Hâc İbrahim, el-Hâc Halil b. İbrahim, Mehmed Bey b. Hüseyin.