Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 216 Hüküm no: 235 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlullah Paşa Vakfı mütevellisinin vefat eden Râbia Hatun’un varislerine açtığı veraset davasından vazgeçtikleri Zikri âtî husûsun mahallinde ketb ü tahrîr[i] için savb-ı şer‘-i enverden irsâl olunan Mevlânâ Ahmed Efendi b. Hüseyin medîne-i Üsküdar’a tâbi‘ Çengar (Çengel) karyesine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘ ettikde merhûm Fazlullah Paşa Vakfı’nın meşrûtiyyet üzere mütevellîsi olan Keşfî Ahmed Halîfe b. Ömer nâm kimesne ile bin yüz elli senesinde karye-i mezbûre mültezimi Ahmed Ağa b. İbrahim nâm kimesneler meclis-i ma‘kūd-ı mezkûrda işbu râfi‘ü’l-vesîka Mehmed Ağa b. İbrahim nâm kimesne mahzarında her biri ikrâr ve takrîr-i kelâm edip karye-i mezbûrede bilâ-vâris fevt olanların terekelerini ahz u kabza bâ-hatt-ı hümâyûn kabza memûr olduğumuz ecilden bundan akdem karye-i mezbûrede fevt olan Râbia bt. Abdullah nâm hatunun usûbet-i nesebiye cihetinden hasren vârisesi olan Âişe nâm hatun işbu i‘lâm mûcebince verâseti[ni] vech-i şer‘î üzere isbât edip mezbûre Âişe’nin verâsetine hükm-i şer‘î lâhık oldukdan sonra mezbûre Âişe’nin vekîli hâzır bi’l-meclis es-Seyyid Mehmed Ağa müteveffât-ı mezbûrenin terekesinden olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzili verâseti sebebiyle mezbûr Mehmed Ağa’ya semen-i ma‘lûma bey‘ ü teslîm etmiş idi lâkin mezbûre Âişe vâris değildir deyü da‘vâya tasaddî etmiş idik husûs-ı mezbûra müte‘allıka vechen mine’l-vücûh mezbûr Mehmed Ağa ve gerek mezbûre Âişe ve gerek vekîl-i mezbûr es-Seyyid Mehmed Ağa ile kat‘â da‘vâ ve husûmetimiz olmayıp meccânen da‘vâ-yı mezkûremizden fâriğler olduğu [olduk] dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Mustafa ve Muhzır Osman ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Salih Efendi b. Mehmed, Süleyman Ağa b. Osman, el-Hâc Osman b. Mustafa, el-Hâc Mustafa, Ali Çelebi b. Mehmed, Mustafa Beşe b. Ebubekir, Mehmed Beşe b. Hasan, Mustafa Beşe b. Ali.