Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 216 Hüküm no: 236 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin adlı çocuğun nafakası için miras kalan evinin Ahmed Beşe’ye satıldığı Medîne-i Üsküdar’a tâbi‘ Nerdübanlı nâm karye sâkinlerinden iken bundan akdem fevt olan Mustafa Beşe b. Hüseyin b. Abdullah’ın hasren vârisi olan sulbî sagīr oğlu Hüseyin’in tesviye-i emrine bâ-hüccet-i şer‘iyye vasiye-i mansûbesi olup zâtı vech-i şer‘î üzere mu‘arrefe olan ceddesi Fâtıma bt. Mustafa nâm hatun meclis-i şer‘-i şerîf-i enverde işbu râfi‘ü’l-vesîka Ahmed Beşe b. Ali nâm kimesne mahzarında bi’l-vesâye ikrâr ve takrîr-i kelâm edip karye-i mezbûrede vâki‘ iki tarafdan tekye ve bir tarafdan Altıparmak Mehmed Beşe mülkü ve ba‘zan Rabiş Hatun mülkleri ile mahdûd iki bâb fevkānî oda ve bir anbâr ve bir ahır ve bir samanlık ve bir harman yeri ve bir mikdâr bahçe ve bi’r-i mâyı müştemil bir bâb mülk menzil müteveffâ-yı mezbûrun ile’l-vefât mülkü ba‘de’l-vefât oğlu sagīr-i mezbûr Hüseyin’e isâbet ve intikāl edip lâkin müteveffâ-yı mezbûrun düyûn-ı müsbetesini edâya menzil-i mezbûrdan gayrı mâlı olmadığından mâ‘adâ sagīr-i mezbûrun nafaka ve kisveye eşedd-i ihtiyâcı olmağla zarûret-i nafaka ve zarûret-i deyn için menzil-i mezbûrun bey‘i lâzım geldikden sonra menzil-i mezbûru bi’l-izni’ş-şer‘î ba‘de’l-müzâyede ve inkıtâ‘i’r-rağbe mezbûr Ahmed Beşe üzerinde yüz guruşda karâr ve ziyâde ile tâlib-i âhar zuhûr etmeyip semen-i merkūm menzil-i mezkûrun el-yevm semen-i misli olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve nümâyân oldukdan sonra menzil-i mahdûd-ı mezkûru bey‘-i bâtt-ı sahîh-i şer‘î ile semen-i mezkûr yüz guruşa bi’l-vesâye mezbûr Ahmed Beşe’ye bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruşu mezbûr Ahmed Beşe yedinden vesâyetim hasebiyle bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mezkûr mezbûr Ahmed Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî-selhi Rebî‘ülevvel sene 1151 Şuhûdü’l-hâl: Hüseyin Beşe b. Emrullah, Mehmed Beşe b. el-Hâc Mustafa, Salih Beşe b. Bayezid, Mehmed Beşe b. Bayezid, Cebeci Mustafa b. ( ), Veli Bey b. Mehmed, es-Seyyid Süleyman b. Mehmed, Hasan Bey b. Ramazan.