Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 219 Hüküm no: 241 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin bakmakta olduğu küçük çocuk için nafaka takdir edildiği Medîne-i Üsküdar’da Kefçe mahallesi sâkinlerinden Osman Beşe b. Mustafa nâm kimesne meclis-i şer‘-i şerîf-i enverde bast-ı kelâm ve ifâde-i merâm edip Fâtıma bt. Ahmed nâm sagīre tahmînen altı yaşında olup li-ecli’t-tebennî terbiyemde olmağla nafaka ve kisveye eşedd-i ihtiyâcı olmağın men-lehü’l-hakku’t-taleb üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunması matlûbumdur dedikde hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi târîh-i kitâbdan külle yevm altışar akçe farz ve takdîr buyurup sagīre-i mezbûrenin levâzımına harc ü sarfa ve lede’l-hâce istidâneye ve vakt-i zaferde men-lehü’l-hakku’t-taleb üzerine rücû‘a mezbûr Osman Beşe’ye kıbel-i şer‘den izin verilmeğin mâ-vaka‘a bi’t-taleb ketb olundu. Fî 5 Rebî‘ülâhir sene 1151 Şuhûdü’l-hâl: Berber Mustafa Çelebi b. ( ), Hâfız Ömer Efendi b. Mustafa, Mehmed Usta b. ( ), Hasan Beşe b. ( ), Berber el-Hâc Mustafa b. ( ), Mustafa Beşe b. ( ), Veli Ağa b. Mehmed, es-Seyyid Süleyman b. Mehmed, Hasan Bey b. Ramazan ve gayruhum.