Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 220 Hüküm no: 242 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin bağını diğer Mehmed Beşe’ye sattığı Medîne-i Üsküdar’da Câmi‘-i Kebîr mahallesi Mehmed Beşe b. Mehmed nâm kimesne meclis-i şer‘-i şerîf-i enverde işbu râfi‘ü’l-vesîka el-Hâc Mehmed Beşe b. İsmail nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup medîne-i mezbûreye muzâfe Adalar nâhiyesine tâbi‘ Yakacık karyesi bağları hilâlinde ze‘âmet toprağında vâki‘ bir tarafdan el-Hâc Mehmed bağı ve bir tarafdan Abdullah Beşe bağı ve bir tarafdan Mustafa bağı ve bir tarafdan tarîk-i âm ile mahdûd tahmînen iki dönüm bir kıt‘a kürûmu mülk bağımı tarafeynden îcâb ve kabûlü hâvî bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yetmiş guruşu mezbûr el-Hâc Mehmed yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden bağ-ı mahdûd-ı mezkûrda benim kat‘â alâka ve medhalim kalmayıp mezbûr el-Hâc Mehmed Beşe’nin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: es-Seyyid Süleyman b. Mehmed, el-Hâc Hanefi b. Ali, Mustafa b. Ali, İsa Beşe b. Musa, Mehmed Bey b. Hüseyin, Osman Bey b. Ahmed, Mustafa Bey b. Halil, Hasan Bey b. Ramazan.