Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 220 Hüküm no: 243 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Musa Beşe’nin vasiyetinin icrası için Bahçıvanlar Kethüdası İbrahim Beşe’yi vasi tayin ettiği Fi’l-asl vilâyet-i Rumeli’de Peremedi kazâsına tâbi‘ Merkoşder? karyesi sâkinlerinden olup medîne-i Üsküdar’da Kefçe mahallesinde sâkin bahçıvan tâifesinden Musa Beşe b. Ali nâm kimesne meclis-i şer‘-i şerîf-i enverde işbu râfi‘ü’l-vesîka Bahçıvânlar kethüdâsı İbrahim Beşe b. Hasan nâm kimesne mahzarında takrîr-i kelâm ve ta‘bîr ani’l-merâm edip eğer ben bi-emrillâhi te‘âlâ dâr-ı fenâdan dâr-ı bekāya intikāl ve rıhlet edersem mezbûr İbrahim Beşe vasiyy-i muhtârım olup cemî‘ terekemi ahz u kabz edip evvelen techîz ve tekfînimi görüp ba‘dehû dört bin akçe bir def‘a ve iki bin akçe bir def‘a deynimi min-haysü’l-mecmû‘ altı bin akçe deynimi edâ ettikden sonra terekemden fazlaya ne bâkī kalırsa karye-i mezbûrda sâkine zevcem Ümmügülsüm ile sagīr oğlum Ali’ye îsâl ve teslîme mezbûr İbrahim Beşe’yi vasiyy-i muhtâr nasb u ta‘yîn eyledim dedikde ol dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Hâfız Ömer b. Mustafa, Mustafa Efendi b. Abdullah, es-Seyyid Abdullah Efendi b. Hamza, es-Seyyid Mustafa Efendi b. Ali, Bostânî Hüseyin Bey b. Mustafa, Ali Beşe b. Mustafa, es-Seyyid Ömer Efendi b. Mustafa, el-Hâc Hasan b. Ali.