Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 221 Hüküm no: 244 Orijinal metin no: [65a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’nin menzilini müştemilatıyla birlikte Hatice Hatun’a sattığı Tahakukk-ı özr-i şer‘îye binâen husûs-ı âti’l-beyânın mahallinde ketb ü tahrîri iltimâs olunmağın bu fakīr medîne-i Üsküdar’da Arakıyeci el-Hâc Cafer mahallesinde sâkine Hadîce bt. Mehmed nâm hatunun menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî olundukda mahalle-i mezbûre sâkinlerinden es-Seyyid Süleyman Efendi b. es-Seyyid Salih nâm kimesne meclis-i ma‘kūd-ı mezkûrda işbu râfi‘atü’l-vesîka mezbûre Hadîce Hatun mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ iki tarafdan mezbûre Hadîce Hatun mülkü ve bir tarafdan Yusuf mülkü ve bir tarafdan tarîk-i âm ile mahdûd biri şehnişînli ve biri sagīr iki bâb fevkānî oda [ve] dehliz ve kenîf ve orta kapı önünde vâki‘ tûlen ve arzen bi-hesâb-ı terbî‘î yetmiş zirâ‘ arsa üzerinde mevcûd harâb matbah odası ve mağsel ve kenîfi ve bir mikdâr havluyu müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz guruşa mezbûre Hadîce Hatun’a bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm üç yüz guruşu işbu meclisde mezbûre Hadîce Hatun yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mezkûra müte‘allıka vechen mine’l-vücûh mezbûre Hadîce ile da‘vâ ve husûmetim kalmayıp zimmetini ibrâ ve iskāt eyledim fîmâ-ba‘d menzil-i mahdûd-ı mezkûrda benim kat‘â alâka ve medhalim kalmayıp mezbûre Hadîce’nin mülk-i müşterâsı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Umdetü’l-kuzâti’l-kirâm Ahmed Efendi b. Hüseyin Efendi, es-Seyyid Mehmed Ağa b. Ali, es-Seyyid Hüseyin Ağa b. Hüseyin, Mustafa Ağa b. Abdullah, Mehmed Efendi b. Mustafa, Ali Ağa b. el-Hâc Ali, Ali Ağa b. el-Hâc Mehmed, el-Hâc Mehmed b. Abdülcelil, Molla İbrahim b. İbrahim.