Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 229 Hüküm no: 254 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah Beşe’nin menzil ve dükkânlardaki hissesini kız kardeşi Rukiye Hatun’a sattığı Medîne-i Üsküdar’da Hacce Hatun mahallesi sâkinlerinden Emrullah Beşe b. el-Hâc Mehmed nâm kimesne meclis-i şer‘-i hatîrde li-ebeveyn kız karındaşı işbu râfi‘atü’l-vesîka Rukiye Hatun bt. el-mezbûr el-Hâc Mehmed mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup medîne-i mezbûrda Selman Ağa mahallesinde vâki‘ bir tarafdan Kürkçü Ali Çelebi ve bir tarafdan İstanbullu Çelebi ve bir tarafdan İsmail Çelebi mülkleri ve bir tarafdan tarîk-i âm ile mahdûd hâriciyede iki bâb fevkānî oda ve kenîf ve dâhiliyede üç bâb oda ve bir matbah ve bi’r-i mâ ve kenîf ve bahçe ve tahtında vâki‘ biri manav ve biri kasab ve biri kolancı üç bâb dükkânı müştemil mülk menzil yirmi dört sehm i‘tibârıyla on yedi sehmi irsen ve şirâen benim mülküm ve yedi sehmi kız karındaşım mezbûre Rukiye’nin irsen mülkü olmağla menzil-i mahdûd-ı mezkûrda ve dükkânlarda olan on yedi sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile kız karındaşım mezbûre Rukiye Hatun’a beş yüz guruşa bey‘ ü teslîm ve temlîk eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm mutâlebesinden kız karındaşım mezbûre Rukiye’nin zimmetini ibrâ ve iskāt eyledim ba‘de’l-yevm zikri mürûr eden menzil ve dükkânlarda benim kat‘â alâka ve medhalim kalmayıp irsen ve şirâen kız karındaşım mezbûre Rukiye’nin mülk-i mahzı ve hakk-ı sırfıdır keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî-selhi şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Osman Efendi el-İmâm, Mustafa Çelebi b Hüseyin, Tanburzâde, Salihzâde, Bayrakdâr Ahmed Beşe, İbrahim Çelebi b. Abdullah, Veli Bey b. Mehmed, es-Seyyid Süleyman b. Mehmed, Hasan Bey b. Ramazan.