Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 231 Hüküm no: 256 Orijinal metin no: [66b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un bazı eşyalarını Hüseyin Beşe ve hanımı Râbia’ya sattığı Medîne-i Üsküdar’a tâbi‘ Kādı karyesinde sâkine ve zâtı İmâm Mustafa Efendi b. Hüseyin ve Hasan Efendi b. Mehmed nâm kimesneler ta‘rîfleriyle mu‘arrefe olan Râbia bt. Dilaver nâm hatun meclis-i şer‘-i hatîrde gelini işbu râfi‘atü’l-vesîka diğer Râbia bt. Mehmed nâm hatun mahzarında bi-tav‘ihâ ikrâr ve takrîr-i kelâm edip mezbûre diğer Râbia’nın zevci işbu hâzır bi’l-meclis Hüseyin Beşe nâm kimesneye mâlike olduğum eşyâ-i ma‘lûmemi semen-i ma‘lûmeye bey‘ ü temlîk ve teslîm eylemişdim el-hâletü hâzihi mezbûr Hüseyin’in yedinde olan mübâya‘a hücceti mantûkunca eşyâ-i ma‘lûmede benim kat‘â alâka ve medhalim kalmayıp derûn-ı hüccetde mezkûr olan eşyâ-i ma‘lûmeye ve kıymetlerine müte‘allıka gerek mezbûre diğer Râbia ve gerek zevci merkūm Hüseyin Beşe ile vechen mine’l-vücûh ve sebeben mine’l-esbâb da‘vâ ve husûmetim olmayıp zevcân-ı mezbûrânın zimmetlerini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ vâka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: İmâm Mustafa Efendi b. Hüseyin, Hasan Efendi b. Mehmed, Mehmed Ağa, Mustafa Çelebi b. Ali, Yusuf Beşe b. Mehmed, Ali Çelebi b. Mehmed, Mustafa Çelebi b. Süleyman, el-Hâc Mehmed b. Ahmed.